Impeachment complaint maikontra ken Chief Justice Corona, mangrugin ti pabuya!

Nakasaganan dagiti senador a mangdengngeg iti impeachment complaint ti Kamara maikontra ken ni Supreme Court Chief Justice Renato Corona.

Nupay kinuna dagiti agilinlinteg nga agpaay a prosekutor a saan nga agbayag ti pannakadengngeg ti impeachment complaint maikontra ken ni CJ Corona, adda dagiti pagilasinan a saan a pumudno daytoy. Manamnama ketdi a tunggal sangkapirgis nga ebidensia nga iruar ti prosekusion, nainget a busisaen ken pirpirsayen dagiti abogado ti depensa tapno saan a maaramat a pangsirut iti tengnged ti klienteda. Manamnama pay ti panagrinnupak dagiti dua a partido kadagiti teknikalidad a mangited iti bentahe wenno pakadaksan iti agsumbangir. No kastoy ti mapasamak, agbayag la ketdi ti pannakadengngeg iti impeachment complaint.

Pagarigan laengen ti kiddaw ti prosekusion nga iparuar ti CJ a dokumento, kas iti statement of assets and liabilities and networkna. Kuna ti prosekusion nga adda dagiti sanikua ni Corona a saanna nga indeklara iti SALN manipud idi nagtugaw nga associate justice ken chief justice ti Korte Suprema a kunada a panaglabsing iti linteg. Kayat pay ti prosekusion a mapaayaban ti asawa, annak, asideg a bagi ti CJ ket ikuyogda dagiti deed of sale, ken dadduma pay a dokumento a mangpaneknek nga isuda ti agtagikua kadagitoy a sanikua. Alegasion ti prosekusion nga iti sueldo laeng ni CJ, saanna a kabaelan ti maaddaan kadagitoy a sanikua. Iti ababa a pannao, ill-gotten wealth dagitoy.

Dagiti pay laeng mapapati a sanikua ni CJ dagitoy imbinsami. Maysa laeng daytoy iti walo nga articles of impeachment maikontra ken ni CJ Corona. No denggen amin dagiti senador dagitoy, uray innem a bulan, agkurang. Dakkel a panawen ti ipaayda para laeng iti pannakadengngeg iti impeachment complaint, imbes a maipaay koma para kadagiti problema iti ekonomia, salun-at, edukasion, ken dadduma pay a pakaseknan dagiti umili. Iti nalawlawag a pannao, dagiti umili ken ti pagilian ti agsagaba.

Awan koma daytoy a mapaspasamak no saan a dinutokan ni dati a Presidente Arroyo ni Corona a chief justice sakbay a bimmaba iti puesto, no koma saan nga inawat ni Corona ti posision nupay daytoy ti pannakakorona ti kinahuesna, no koma nagulimek lattan ni Presidente Aquino ket ibilangna laengen a paset ti rekonsiliasion, no koma…. Adu a no koma…

Kabayatanna, malaksid ti pannakabingay dagiti umili, maipasuli pay laeng dagiti problema ti pagilian tapno laeng mapaikkat ti maysa a chief justice nga iti panagkita ti administrasion ket tubeng iti panangkamatna kadagiti agtuturay a mapapati a nangkurimes kadagiti pondo ti pagilian.#