Implementasion dagiti infrastructure projects iti Burgos, dinillaw ti inhiniero

BURGOS, Ilocos Sur — Agtultuloy a panagteppang ti daga a malasatan ti karayan gapu ti kaawan ti umno a river control, maburbor a konkreto a farm to market roads, ken ti napaut a pannakabangon ti public market iti ilida.

Daytoy ti inrakurak ni Engineer Cornelio Carta Jr. iti ili a Burgos, Ilocos Sur kadagiti kameng ti Ilocos Sur Integrated Press kabayatan ti pannakiuman kenkuana.

Impeksa ni Engineer Carta, project contractor ti nalatak a subdivision iti Candon City ken sigud a Division Engineer ti Department of Education ti Pangasinan ken Abra ti pamilawan ken pannakadismayana kadagiti maisaysayangkat nga infrastarcture projects iti ilida iti laksid dagiti minilion a pondo a tinawen nga alokasion ti Burgos manipud iti R.A. 7171 Fund.

Inrakurakna nga iti las-ud ti 18 a tawen ti nagsaruno nga administrasion ket naginad ti nagprogresuan ti ilida kas 4th class municipality uray no tinawen dagiti minilion a maaw-awat a pondo ti municipal a gobierno.

Impakaammona a dagiti nakonkreto a farm-to-market roads iti Burgos nangruna sadiay Barangay Bessang, Mapanit ken Lubing nga agkasapulan iti umno a kalidad ti pannakasemento ken pannakamantinerda. Dinillawna pay ti agtultuloy nga ilalawa ti karayan gapu ti panagteppang ti daga a kasapulanna ti nalagda a river flood control tapno malapdan ti panagkurukor ken pannakalayus. Impalgakna ti saan a pannakailepleppas ti public market a narugian pay idi 2013 ken ti saan a tumutop a disenio ken lokasionna.

Impaganetgetna a kas inhiniero ket kalikagumanna ti umno a pannakaisayangkat dagiti poyekto tapno saan a masaysayang ti pondo ti gobierno a nagtaud iti buis dagiti umili. Inlawlawagna a kas nagtaud iti natakneng a pamilia a napadakkel nga addaan iti dignidad ti pagsapul, ket tarigagayanna ti agpaidasig a para mayor iti Burgos iti maikadua a gundaway tapno maaddaan ti pagpilian dagiti umili para iti nasayaat a gobierno.  Impakaammo a no pagasatan ket ikagumaanna ti umno a proseso ti pannakaipakat dagiti amin a pondo ken proyekto ti munisipio.

Ni Engr. Carta ket agdama pay a barangay chairman wenno Kapitan iti Brgy. Dayanki. Agkandidato ni Engr. Carta a para Mayor iti salinong ti PDP Laban iti maikaduan a gundaway ta naabak idi naudi nga eleksion. 

Makabalubal ni Engr. Carta ni Vice Mayor Nathaniel Escobar ti Bileg Party, sigud a mayor a nagtaken iti tallo a termino.