Imported dry goods a segunda mano, nakumpiska

MAGSINGAL, Ilocos Sur – Tallo a lallaki ti naipan iti police station ditoy gapu iti mapapati a panagipuslitda kadagiti imported a segunda mano nga aruaten a mailako ditoy nga ili.

Segun iti report, agpatpatrolia iti Barangay Sta. Monica dagiti polis nga indauluan ni OIC Police Inspector Andrew Patao Rabang idi masaripatpatanda iti asideg ti Caltex Gasoline Station iti nadakamat a barangay ti maysa a Hyundai Grace Van, maris asul, awanan iti plate number a naikabit iti sango ken iti likud.

Nainaganan ti drayber ti van a ni Roderick Santiago y Medina, 36, naasawaan, ken residente iti Bagong Sikat, Cabanatuan City, Nueva Ecija ken dagiti kakaduana a da Ronald Valdez y Vitales, 40, naasawaan, kalugaran ti drayber, ken ni Edmar Pablo y Tabual, 21, baro, mannalon ken residente iti Barangay Padul, Solana, Cagayan.

Iti panagsukimat dagiti polis iti van, natakuatanda a nagkarga daytoy iti siam a sako a nakaikargaan dagiti imported dry goods (ukay-ukay) a mapattapatta nga agbalor amin iti P54,000.00.

Dinawat dagiti polis dagiti kasapulan a dokumento kas iti clearance wenno otorisasion ti importasion manipud iti umisu nga otoridad, ket idi awan ti naiparang dagiti tallo,  inawis ida dagiti polis iti police station agraman ti kinumpiska a karga ti van.#