Improvised explosive device, nasarakan naikutkot kadaratan

VIGAN CITY – Maysa nga improvised explosive device ti nasarakan iti igid ti baybay ti Barangay San Pedro ditoy siudad idi agsapa ti Oktubre 27.

Nagresponde dagiti polis apaman a naidanon ti nasao nga impormasion babaen iti selpon ken ni Police Supt. Jugith del Prado, OIC ket positibo ti impormasion.

Segun iti report, bayat ti panagpatrolia dagiti elemento ti 103rd Maritime Police Station a nakabase iti Barangay Mindoro, Vigan City nga indauluan ni PO3 Orlino Garalde Palalay, nakadiskobreda iti innem a nagtimbukel a botelia a mapapati a nagkarga iti ammonium nitrate a maar-aramat iti illegal a panagkalap, ken maysa a kaha ti pusporo a naikabil iti nangisit a shoulder bag a nagaboran ti pasetna iti darat.

Mapapati a naikutkot iti kadaratan dagiti bongbong babaen dagiti di am-ammo a tao.

Adda iti kustodia dagiti 6 nga IEDs iti 103rd Maritime Police Station para iti umisu a disposision.#