Improvised floating devices, naigannuat

CAOAYAN, Ilocos Sur – Tapno adda salaknib dagiti umili nangruna iti panawen ti kalamidad, ilunglungalong ti lokal a gobierno ditoy ti pannakaaramid dagiti improvised floating device kadagiti barangay ditoy nangruna dagiti coastal barangays.

Segun ken ni Renato Quiocho, inggunamgunam ti lokal a gobierno nga idadauluan ni Mayor Germie Singson-Goulart kadagiti agindeg kadagiti barangay ditoy nga ili ti panagurnongda kadagiti awan naggianda a botelia a plastik sadanto mabalkot iti iket tapno maaramat a pagpatawan no adda sumangbay a kalamidad, kas iti layus.

Ti lokal a gobierno ti mangipaay kadagiti iket idinto a dagiti dadduma ket agtaud iti maresiklo nga iket manipud kadagiti bukatot.

Masansan nga adda dagiti coastal barangays ditoy a maireport a malayus no agdinakkel ti baybay wenno iti karayan no adda sumangbay a bagyo.#