In Media Res

Iti maysa kadagiti sinurattayo nga artikulo para itoy a kulom, dinakamattayo naminsan ti maysa kadagiti naruay a literary devices ken techniques. Daytoy ti In Medias Res. Wenno Medias In Res kadagiti dadduma. Ngem saantayo nga impalawag a nalaing daytoy kadayta a sinurat ta napanunottayo nga isu ti intay trataren a suraten iti masanguanan nga aldaw.

Pinadastayon nga inaramat daytoy a tekniko. Dimtengen ti gundaway a panangtratartayo iti daytoy a literacy device wenno technique. Padasentayo ngarud nga ibuksilan ken utoben ti kinangayedna a kas bunga ti arte. Padasentayo nga ilawlawag ti kapadasantayo a nangsurat.

Dakamatentayo ditoy nga adu a rigattayo a nagsukisok kadagiti library, nga uray la datao kimmuttong a nagres-research, nagkalkalimduosan iti berde ngem naglaka met gayam nga aramiden no ammo ti teknikna. Kas met la gayam kalaka ti agareb-eb iti digo ti dinengdeng a saluyot  ti kalakana a suraten!

Ta ania ngamin daytoy a tekniko iti panagsuratan? Kasano ti kinapategna?

Panglakagan!

Dayta ngatan ti maysa kadagiti kalawagan nga interpretasion  kadagitoy a literary devices ken techniques iti Iluko. Panglakagan tapno maragpat ni author ti  kayatna nga iparang iti sarita iti bukodna a kombiniente a wagas. A kas arte ti sinurat.

Nagduduma dagitoy a wagas. Posible nga iti daytoy a wagas ket addaan ti author iti kabukbukodan nga intension a kas kadagiti sumaganad:

1. adda ilemmengna — nasken nga ilemmengna dayta¬† situasion, pasamak wenno banag tapno saan a malabusan ti sarita.

Ehemplo:

a. kas paripirip ti sibubukel a sarita

b. kinaasino ti kontrabida

c. kinaasino ti bida (kadagiti phantom stories)

d. banag wenno pasamak a napateg unay iti sarita

e. ken dadduma  pay

2. adda iparangna

a. iparangna ti maysa a banag a pangigibusnanto

b. kas simbolismo

c. kas paripirip (iti sibubukel a  sarita wenno ti eksena laeng)

d. panangidetalie iti napalabas

e. ken dadduma pay

Iparangna ti maysa a banag a paggibusannanto. Wenno iparang ti paggibusanna sakbay nga irugi. Maysa met a panglakagan daytoy.

Panglakagan no kuna, kinakombiniente ti author a mangsurat itoy a wagas a kas sidap ti utekna  nga agputar iti bunga ti arte.

Daydiay man arte a kapkapnekanna. Arte a bukodna.

Intay man ngarud taldiapan ti kayatna a sawen wenno definition.

In medias res or medias in res (“into the middle of affairs”) is a Latin phrase denoting the literary and artistic narrative technique wherein the relation of a story begins either at the mid-point or at the conclusion, rather than at the beginning, establishing setting, character, and conflict via flashback and expository conversations relating the pertinent past.

Mangrugi ti sarita wenno nobela wenno epiko wenno ania man a sinurat nga adawen iti katengngaan ti sarita (mid-point) wenno iti paggibusanna (conclusion). Mangadawka sadiay katengngaanna a kas pangrugian. Wenno saan met, adawem ti paggibusanna a kas pangrugian. Kasta laeng. Nalaka, saan?

Ania a nalaka a sasawem met? Dimo pay ammo ti pangrugianna, ammomto la ketdin ti tengnga wenno ti paggibusanna? Umun-una met ngarud a suratem ti pangrugianna ta irugim ngarud. Saan met a mabalin nga unaem a suraten ti tengngana wenno ti gibusna samo suraten ti rugina. Imposible dayta nga ibagbagam, mabalin nga irikiarmo.

Dayta ti kaunaan nga impression ti mannurat. Ngem saan a parikut ti mannurat a nawada ti panunotna dayta a banag. Aglalo no saanna a pagparikutan. Apay a pagparikutam ti banag a saan met nga isu ti parikut? Ta iti panangimutektek a nalaing, saan a parikut dayta. Saan a parikut no trataren daytoy a kas paglakagan ti iparang nga arte. Ta saan kadi nga arte ti sursuraten?

(Adda tuloyna)