Footer

INDAYON NI LAGIP: Beggang (Maikadua a paset)

Iti panagsikogko, nadungngo nga agtaripato ni Freddie, Manong Danny. Itedna amin a kayatko tapno kano diak maalisan. Kayatna a kanayonak a nakaisem tapno kano naguapo wenno napintasto ti anakmi. Kanayonnak nga igatangan iti prutas, bitamina ken amin a kasapulan ti maysa a masikog.

Wen, Manong Danny, siam a bulan a sinalimetmetak daytoy a sikogko. Agsipud ta kayatko met nga ipaayan ni Freddie iti anak. Ta daytoy ti pammasingked iti napalaus a panagayatko kenkuana. Sinurotko dagiti kalikagumna.

Dimteng ti aldaw a tagtagiuraymi amin, Manong Danny. Agtengnga ti rabii idi mariknak ti panagsakit ti tianko.

“Lakay, aganakak san,” kinunak. Insigida a bimmaringkuas.

Makakatawaak nupay agsakiten ti tianko. Nakarkaro pay gayam ti nerbios ni Freddie. Dina ammo ti aramidenna.

“Inka mangayab iti luganen, a. Ipannakon iti ospital, ket ne, agsakiten ti tianko,” indagdagko.

Maysa a nalungpo a lalaki ti inyanakko, Manong Danny. Pinanagananmi iti Adriane. Kasta unay ti ragsak ni Freddie. Dinak pinanawan iti ospital.

“Daytoy ti pammasingked ti ayan-ayatta, Olivia. Gapu ken ni Adriane, ad-adda nga ayatenka,” nakunana pay.

Anian a nagsam-it a denggen dagiti balikasna. Nagasatak a parsua ta nakaasawaak iti kas ken ni Freddie, nakunak.

Ngem nagbiddutak gayam, Manong Danny. Diak ninamnama a dumteng ti panawen nga agbaliw ti asawak. Kalpasan gayam ti ragsak, dumteng met ti liday. Dumteng met gayam dagiti kalbario a mangpaalsem iti dati a nasam-it nga ayan-ayat.

Idi damo, bimmattaway ti panaggawid ni Freddie kalpasan ti panagbiahena. No diak tawagan iti cellphone, diak pay maammuan a nakasangpet gayam ditoy Vigan.

Adu dagiti pasahero isu nga awan ti gundawayna nga aggawid ta sayang ti porsientona, inrasonna. No ngamin adu ti makargada a pasahero, adda porsientoda.

Namatiak met idi damona, ngem bumaybayag metten ti dina isasangpet ditoy balay. Ket no agawid man, pagbiit laengen ket pumanaw manen. Kasla kanayon nga agdardaras.

Adda napasgedan a suspetsa iti panunotko idi dua a bulan a saan a naggawid. Ngem pamrayak nga inyaw-awan dayta a suspetsak ta mamatiak a saan a maaramid ni Freddie a liputannak.

Pamrayak la ti agkatawa no adda maidanon kaniak a damag nga adda dumagdagasanna no aggapu iti Manila. Ngem no dadduma, sumngay ti panagduadua aglalo ket ad-addan a napustora ni lakay. Adda payen sabali a pay-od iti pagan-anayna nga iyawidna ditoy balay.

Adda babai ni Freddie? Nagbalin dayta a saludsod a mangriing kaniak iti kaltaang ti rabii, aglalo iti kalam-ekna, ket mariknak lattan ti pannakabasa ti punganko.

(Adda tuloyna)