INDAYON NI LAGIP: Beggang (Maikapat a paset)

Iti ili ti maysa a kabsat ni Nanang ti nagpaknianmi nga agina. Pinilik daytoy ta adayo iti ili. Kayatko ti agmaymaysa. Nasaem ti sugat nga impalay ni Freddie iti kaunggak. Diak ammo no kaanonto ti panaglunitna.

Impudnok ti amin ken ni Anti ti nakaigapu iti panagtalawmi nga agina. Nagyamanak ta naawatannak ni Anti.

“Aggiankayo ngarud ditoy,” nakunana.

Kadagiti simmaruno nga aldaw, kasla nagmanto latta ti langit kaniak. Uray no adda ar-aramidek, diak masarkedan ti saan nga aglua no kasdiay a makitak ti anakko nga itultulod ni Anti iti indayon. Kasla masirsirmatak ti nasipnget a masakbayan ti anakko agsipud ta awan ti amana a mangited kenkuana dagiti kasapulanna iti panagdakkelna.

Ngem pinatibkerko ti pakinakemko. Masapul nga ilangoyko ti biagmi nga agina. Masapul a bumangonkami iti nakaitiklebak.

Adda met bassit a naidulinko ket inggatangko iti dua a baboy a pagganakek. Saanko a problema ti pagpakan ta adu ti ngalog iti kataltalonan kasta met dagiti nagtebbaan a saba iti inaladan ni Anti ken dagiti kaarrubami. Dagitoy ti inan-anusak nga inil-ilgat a pinagpakan iti baboyko. Nagayyemko ti adda karinderiana iti asideg ti pagadalan ket inaldaw a mapanak agala iti naginnawan.

Kalpasan ti lima a bulan, dadakkelen dagiti tarakenko. Pinasumpitak iti kaarrubami a beterinario iti semilia.

Naggiddan a naganak dagiti baboyko. Walo ken pito ti annakda.

Nawadwad bassit ti naglakuak iti burias. Indulinko ti kagudua ti naglakuak ket gimmatangak pay iti limapulo a piek a Sasso. Malaksid a dadakkel ti pagbalinan dagitoy, saanda pay a napili iti kanenda.

Kalpasan ti dandani dua a bulan, naglakoakon iti Sasso. Immadu dagiti sukik. Uray dagiti adda iti kaparanget a barangay, umayda metten aggatang kaniak iti manok ken baboy.

Napalabas ti tallo a tawen a diak napupuotan. Napadakkelko ti poltrik ken ti baboyak. Adda payen dua a katulongak. Iti malem no agtakderak iti sanguanan dagiti taeng dagiti baboy ken manok a tarakenko, naraniag a masakbayan ti masirsirmatak.

Nain-inut a naglunit ti sugat iti kaunggak. Awanen ti sumken a sakit no malagipko ni Freddie. Umdasen kaniak a makitak ti isem ken mariknak ti nairut nga arakup ni Sally ket mapunas aminen dagiti negatibo a marikriknak.

Nadamagko a natay ti sikog ti babai ni Freddie. Nalaing gayam nga agtong-it. Minalem iti sugalan. Saanna kano payen a masango ti mangan aglalo no maab-abak. Naliwayanna siguro ti salun-at ti anakna isu a nakapsut a timmao.

Kalpasan ti makatawen, nadamagko laengen a pimmanaw ti babai. Nagsubangda kano ken ni Freddie gapu ta kayat ni lakay nga agsardeng iti panagsugalna. Awan ti nakaigawid kenkuana. Saanda kanon nga ammo ti nagturturonganna.

Kinutik laeng ti abagak iti dayta a nadamagko. Awanen ti bibiangko iti biagda, nakunak iti nakemko.

Ngem maysa a malem a pa-naggapuk iti pagadalan a napan nangsukon ken ni Sally, sinabatnak ni Anti iti lalaktawan.

“Adda ni Freddie, ur-urayennakayo,” nakunana.

(Maigibusto)