INDAYON NI LAGIP: Beggang (Maikatlo a paset)

Kasla nagtupak ti lubong kaniak iti dayta a nangegko, Manong Danny. Kayatko ti aglaaw tapno laeng maipapasko ti sakit ti nakemko ken ni Freddie. Diak impagarup a liputannak ti asawak. Ita, lima bulanen ti tian ti babaina.

Nagtarayak nga immuneg iti kuartomi, imbaltogko lattan ti bagik iti katre. Kaslaak ubing a naganug-og.

Saan a simrek iti kuarto ni Freddie iti dayta a rabii. Diak ammo ti nagturoganna. Kabigatanna, agrubrubbuaten a pumanaw idi rummuarak.

“Agsaritata pay a naimbag sakbay a pumanawka, Freddie,” nakunak.

Saan a nagtimek ni Freddie. Inurayna ti sumaruno a sawek.

“No pumanawka ita… sigurado a mapanka iti daydiay a babai. Pagpilienka. Dakami nga agina wenno daydiay a babai.”

“Dakayo ti pamiliak… ” nagbanarbar ti timek ni Freddie.

“Nasayaat no kasta, ngem paneknekam ngarud. Masapul nga iti ipapanawmo ita, agsublika ditoy balay kalpasan ti tallo nga aldaw. Ibagam kaniak nga insinamon daydiay a babai. Aglusuloska metten iti trabahom. Nasaysayaat a dikan agkonduktor tapno maliklikam daydiay a babai.”

“Narigat dayta ibagbagam, ania ngarud ti pangbiagko kadakayo?”

“Mabalinmo ti agbirok iti sabali a trabaho. Ngem no dika agsubli ditoy kalpasan ti tallo nga aldaw, kayatna sawen, napatpateg kenka daydiay a babai ngem dakami. Ket no dimo mapanawan daydiay a babai, dakami ti pumanaw ditoy balay.”

“Maawatam koma met ti situasionko.”

“Tallo nga aldaw, Freddie,” nagdalikepkepak,.“Agsublika ditoy balay a saanen a maysa a konduktor. Urayenka. Urayendaka.”

Kayarigan ti tallo nga aldaw a panagurayko iti ginasut a tawen, Manong Danny. No dadduma, sumngay kaniak ti panagbuteng. Kasanon no saan nga agsubli ni Freddie?

Ngem nakaikeddengakon. No saan nga aggawid ni Freddie kalpasan ti tallo nga aldaw, tungpalek ti pangtak, pumanawkami nga agina.

Ngem kalpasan ti maikatlo nga aldaw, awan ti Freddie a simmangpet, Manong Danny. Nakaluaak a nangmatmat iti anakko. Inkabilko dagiti aruatenmi iti dua a bag ken bassit a maleta.

“Saankayo koma pay a pumanaw, nakkong,” kinuna kaniak ni Inang Trining. “Ammok, agsubli ditoy ni Freddie. Saannakayo a mabalin a tallikudan lattan.”

“Nasaysayaat a pumanawkami, Inang, ta awan metten ti panangipategna kadakami…” nakunak.

“Pangaasim, nakkong. Agparbengka koma.”

Ngem nakaikeddengakon. Iti dayta met laeng a malem, inyulogko dagiti aruatenmi nga agina. Nangayabak iti traysikel.

Sakbayak a naglugan, timmaliawak pay naminsan iti balay a kunak no agbalin nga umok ti ragsak. Ngem saan gayam no di maysan nga umok nga agrakayanton ta timmakias metten ti ayat iti ikubna.

(Adda tuloyna)