INDAYON NI LAGIP: Beggang (Maudi a paset)

“Ania ti kukueen dayta a lalaki ditoy balay?” nakunak ken ni Anti.

“Saankan nga ubing, Mameng. Maymaysa ti kayat a sawen ti isasarungkar ni Freddie… kayatna ti agsubli kenka.”

Diak nagtimek. Diak ammo ngem adda immasibay a rikna, rikna a nagbalin a ganggannaet sipud pay idi pimmanaw ni Freddie iti dennami nga agina.

Nadagsen ti paddakko nga immuli iti balay. Idi tumadogkami nga agina iti salas, timmakder ni Freddie sa immisem.

“N-naimbag a malemmo, Mameng…” nakunana.

“Nasayaat ti malemko tattay… ngem nasidunget itan iti yaaymo…” nakunak.

“Daytoyen ni Sally?” saan nga impadlaw ni Freddie ti pannakasairna iti insawangko. “Dakkel gayamen ti anakta…”

“Anakko… Nabayagen a natay ti amana.”

Pinanggep ni Freddie nga iggaman ti ima ni Sally ngem inyadayok ti ubing. Inayabak ni Anti ket imbagak a mapanda gumatang iti masaramsam iti tianggi.

Nagari ti ulimek iti nagbaetanmi idi duduakamin iti salas. Nagtalinaedak a sitatakder. Nagdalikepkepak.

“A-ammok, nasugatko ti pusom iti saanko a panagsubli ngem…”

“Pangngaasim, dimon ipalagip ti napalabas. Nabayagen nga inkupinko!”

“Wen, akuek ti dakkel a biddut ken basolko. Ngem dinak la kadin maikkan iti sabali pay a gundaway?” kinuna ni Freddie.

“Pinagpilika idi: dakami wenno ti babaim. Pinilim ti babaim. Ita, agsublika kalpasan ti panangtallikudmo kadakami?” nainayad ken nadagsen dagiti balikas a nagaon iti bibigko.

Saan a nakatimek ni Freddie.

“Natalnan ti biagmi nga agina. Saanmo koman a riribuken manen,” nakunak.

“Agsubliakto manen,” nakuna ni Freddie. “Saannakto nga agsardeng agingga iti saanko a magun-od ti pammakawanmo.”

“Saysayangem laeng ti orasmo. Nasaysayaat a daytoyen ti maudi a yaaymo ditoy balay.”

Darumog ni Freddie a pimmanaw. Ngem idi dandanin agpukaw iti nagsapalan, diak nagawidan ti di timmaliaw. Naem-emko ti bibigko. Apay nga adda manen saem nga agpilit a rumkuas iti barukongko?

Diak matimtimek bayat ti panangrabiimi ken Anti. Nakaragragsak ni Sally nga agipadpadamag iti inaramidda iti Day Care ngem saanko nga intaltalek. Tinimtimak ti kanek.

“Ay-ayatem pay ni Freddie?” nagtimek ni Anti.

“Apay a nasaom dayta, Anti?”

“Uray ania ti nagbasolanna iti kallabes, saanmo a maiwaksi nga isu ti ama ni Sally,” nakuna ni Anti.

“Diak kayat ti aglua manen, Anti,” nakunak.

“Ti sagpaminsan a panaglua ti mangpalagda iti maysa a pagtaengan,” nakuna ni Anti.

“Ania ti kayatmo a sawen, Anti?”

“Maawatamto iti masakbayan,” pinisel ni Anti ti dakulapko.

Agpayso, tunggal Sabado, sumarungkar latta ni Freddie ditoy balay. Nupay nakayakayak latta kenkuana, simminged ni Sally kenkuana. Naminsan a panaggapuk iti ili, nadatngak ida nga agkinkinnamat iti paraangan. Idi makitanak ni Sally, agkatkatawa nga immay nangarakup kaniak. Nakaranraniag ti matana a nangpayapay iti amana tapno umasideg. Dinagdagusko nga inserrek ni Sally iti balay.

Nagpakada ni Freddie ken ni Anti. Idi mangeg ni Sally nga aggawiden ti amana, rimmuar sa nagpaubba.

“Agsublikanto manen, dadi, wen?” kinunana.

“Wen, umayakto manen, anak,” kinuna ni Freddie sanak tinaliaw.

Nagpusipos ni Freddie. Insursurotko ti panagkitak iti likudanna.

Nasiputak ti panangpalpaliiw ni Anti kaniak. Umis-isem a nagtung-ed.

In-inut a rimmaniag ti rupak. Wen, annugotek, iti baet dagiti napasamak, adda pay la pammategko ken ni Freddie. Nagbabawi ken kayatna ti agsubli iti dennami nga agina. Saan pay a naladaw ti amin.

Immangesak iti nauneg. Inton sumarungkar ni Freddie, sabalin a Mameng ti madatnganna. Iti maikadua a gundaway, nalaglagda ken natibtibkerton ti umok a baliwanmi a bangonen.#