Footer

INDAYON NI LAGIP: Dagiti Piglat iti Biagko (Tuloyna)

Iti ili ti Apayao ti nakaipadpadak, Manong Danny. Simmurotak iti maysa a padak a balasitang nakigasanggasat nga agbirok iti trabahona sadiay.

Nakastrekak a katulong ti maysa a baket. Bassit ti sueldok ken nadagsen ti trabahok. Agasem ta nagdakkel ti balay a dalusak ken lima a tao ti serbiak nangruna dagiti tallo nga annakda nga agbasbasa iti high school. Ngem inanusak ta kayatko ti makaurnong iti pagbasak.

Kalpasan ti makatawen, nagikkatak ket intuloyko ti panagbasak iti sekundaria. Nagpaayak a librarian iti eskuela tapno adda pangsupusopko iti inaldaw a pagbiagko ken iti kaserak.

Idi nalpasko ti sekundaria, nagsardengak nga agbasa ta awan metten ti gastuek. Nagbirokak manen iti panggedak. Nakastrekak a serbidora iti maysa a restaurant.

Ditoy ti nakasarakak kadagiti nadumaduma ti kitana a tattao. Adda dagiti naasi ket mangibatida iti tip iti lamisaan. Adda met dagiti narusanger ti kababalinda ket bumugkawda pay iti bassit laeng a biddutmi a serbidora.

Inan-anusak dagitoy, Manong Danny, gapu laeng iti arapaapko a lumung-aw iti biag.

Maysa nga aldaw, maysa a grupo dagiti soldado ti simrek iti panganan a pagserserbiak. Nagorderda iti pangngaldaw.

Idi ipanko ti orderda, kinuna ti kaubinganda: “Mabalin ti makiam-ammo, ading?”

Nagpabus-oyak, Manong Danny, ta nadayaw met ti panagsasaona.

Manny Cruzaldo ti pinangiyam-ammona iti bagina. Naidestinoda iti Cadaklan Detachment ti Philippine Army.

Ania ti nagpatinggaam a nageskuela?” dinamagna.

High school laeng, sir,” insungbatko.

Kayatmo ti agbasa? Tulonganka. Saan a bagay kenka ti trabahom ditoy. Sayang ta pintasmo,” kinunana.

Wen, sir, kayatko nga ituloy ti panagbasak. Agyamanak unay no matulongannak,” nakunak.

Kunak no agang-angaw laeng ni Lt. Cruzaldo ngem idi panaglulukat, impannak inyenrol iti vocational course iti Cagayan. Radio operator ti nangiyenrolanna kaniak.

No dadduma, salsaludsodek iti bagik no apay a kasta ti panangisakit ni Lt. Cruzaldo kaniak. No kasdiay a sukonennak iti pagadalan, sutilendak pay dagiti kaadalak nga adda gayam iduldulinko a patpatgek. Dida patien nga awan ti relasionmi ken ni Lt. Cruzaldo uray kasano a panangipettengko a kabsat ti pangiyariganna kaniak.

Adda ngata panagayat ni Lt. Cruzaldo kaniak? masansan a saludsodek iti bagik. Diak ammo ngem adda naisangsangayan a sumngay a rikna kaniak no kasdiay nga umassibay iti panunotko ni Lt. Cruzaldo kadagiti rabii a malukagak iti turogko. Agayatak kadi metten kenkuana?

Anian a ragsakko idi agturposak, Manong Danny. Uray la nakaluaak idi awatek ti diplomak.

Sinabatnak ni Lt. Manny ket linamanonak. Adda inyawatna kaniak a regalona.

Diak napuotan nga inarakup ni Lt. Cruzaldo. Diak nalapdan ti panagtedted ti luak.

Agkatkatawa ni Lt. Cruzaldo a nangpunas iti luak. “Dika madanagan, tulonganka a makastrek iti trabaho,” kinunana.

Maysa nga aldaw, nakaawatak iti tawag ni Lt. Cruzaldo. Mapanak kano idiay kampo. Inrekomendanak nga agbalin a radioman ti CAFGU.

Diak ammo no kasano a masubalitak ti kinaimbagmo, sir,” nakunak.

Dawatek laeng nga agserbika a napudno,” inyisemna.

Manipud ditan, limmag-an ti kasasaadko iti biag, Manong Danny. Umdas metten ti sueldok a para kaniak.

Sumarungkar no kua ni Lt. Cruzaldo iti kaserak. Awisennak a mangan iti ruar. Dina itulok nga aggastoak.

No la koman kaayan-ayatko, nakunkunak iti bagik, Manong Danny.

Maysa nga aldaw, dua a babbai ti immay iti pagtrabahuak. Anian a kigtotko idi mailasinko ida. Da Helen ken Belinda! Dagidi kinaklaseak a nangpaspasakit kaniak gapu iti nababa a kasasaadko idi iti biag!

(Adda tuloyna)