INDAYON NI LAGIP: Dagiti Piglat iti Biagko (Tuloyna)

Naammuak laengen a ni Lt. Cruzaldo ti pangulo ti mission. Agukkonkami iti impormasion nga ipatulodmi a nalimed ken ni Lt. Cruzaldo.

Iti maysa a nasulinek a barangay iti Kalinga ti nagturonganmi. Segun iti intelligence report, masansan nga agdakiwas dagiti NPA ditoy. Ditoy payen ti maturoganda.

Nanglimlimoak a kabagian ti kapitan ti barangay. Asset ti militar ti barangay captain. Iti balayna ti naggianak. Iti aldaw, tumulongak iti trabaho iti talon. Agpayso ti intel a ditoy ti ayuyang dagiti NPA.

Iti panagindegko iti barangay, adu dagiti nakalangenlangenko a rebelde. Naam-ammok ni Ka Jayson a liderda. Agtutubo pay ni Ka Jayson. Agtawen laeng iti nakurang a tallupulo.

Naammuak a nagturpos iti maysa nga unibersidad iti Metro Manila ni Ka Jayson. Uray idi estudiante pay, lideren dagiti militante a grupo. Masansan nga isu ti mangidaulo kadagiti panagprotesta maikontra kadagiti anomalia iti gobierno.

Maysa nga aldaw, nagpukaw lattan ni Ka Jayson. Awan ti makaammo iti nagturonganna. Gayam ta timmipon iti Tignay.

Iti barangay ti pagdagusan da Ka Jayson ken ti bunggoyna no umulogda iti bantay ken iti panagsublida. Madlawko a saan a kabuteng dagiti tattao. Naammuak idi agangay a saan a kas kadagiti dadduma a dadaulo ti NPA a narusanger ti pannakilangenda kadagiti agindeg. Narespeto ni Ka Jayson. No adda agabuso a pasurotna, saan nga agpangadua a mangdusa.

Naammuak nga adu ti sinalsaludsod ni Ka Jayson maipapan kaniak. Nagdamdamag pay iti barangay captain. Ngem nasaganaanmi amin dagitoy. Ammomi a bassit la a biddutmi, ti biagmi ti agpeggad.

Maysa nga aldaw, binisitanak ni Ka Jayson. Dinamagna no kayatko ti tumipon iti Tignay. Kasapulandak kano gapu ta malaksid a nasayaat ti pannakilangenlangenko kadagiti tattao, nakaadalak ken adda ammok iti operasion ti radio.

Saanko a tinung-edan sigida amangan no agsuspetsa. Inikkannak iti makalawas nga agpanunot.

Kalpasan ti makalawas, immay manen ni Ka Jayson iti barangay. Dinamagna no ania ti pangngeddengko.

Imbagak a kayatko ti tumulong iti pannakirupak da Ka Jayson para iti pannakatun-oy iti pudpudno a hustisia ken pannakaited iti kalintegan dagiti marigrigat.

“Namnamaek nga agbalinka a pagwadan a kadua ti Tignay,” nakuna ni Ka Jayson.

(Maituloyto)