INDAYON NI LAGIP: Dagiti Piglat iti Biagko (Tuloyna)

Ka Rene ti nagbalin a birngasko, Manong Danny.

Ditoy a napadasak ti rigat ti agbiag iti kabambantayan nga an-anupen ti linteg. Saankami unay nga agintek iti maysa a lugar amangan no adda makaireport iti kaaddami. Rabii a magnakami no umallatiwkami iti maysa a barangay tapno saandakami a masalamaan dagiti soldado nga agpatrolia.

Nakisang ti taraon nga ipaunegmi gapu ta agakar-akarkami iti paggianan. Saankami a makapagmula ken makataraken iti dingnguen.

Naminsan, dandanidakami nariput dagiti soldado iti panagturongmi iti maysa a barangay. Ngem nakapaglibaskami. Nupay kasta, dua ti naikalang a kaduami. Dagiti nasugatan ti inkuyogmi nga inlibas, nabati dagiti bangkay dagiti kaduami.

Kabigatanna, naireport iti radio a sangapulo a kaduami ti natay iti engkuentro. Ninayonan dagiti opisial ti militar ti bilang dagiti napapatay tapno makaluban ti kinapudno a lima a soldado ti napasag.

Idi namnamaenmi a saandakamin a makamatan dagiti soldado, naggiankami iti maysa a nasulinek a barangay. Nupay dikami dimmawdawat iti makan, nagdisnudo dagiti bumarangay a nangted iti pagbiagmi. Posible a gapu ta makisimpatiada kadagiti NPA wenno adda panagamakda a madangran no agpaidamda.

Agin-inanakami iti sirok ti maysa a kayo idi kellaat nga immalingawngaw dagiti putok. Sangapangen a soldado dagiti rimmaut.

β€œDakesen, daytoy ngatan ti kanibusannak,” naitanamitimko idinto a tinarayko ti M16 a naipasanggir iti puon ti mangga. Timmarayak a nagpakleb iti puon ti maysa a kayo.

Agsisinnallupangen dagiti putok. Dua a kaduami iti makannawanko ti nagikkis. Nakitak ti nalabaga a pimsuak iti barukong ti maysa ken iti pispis ti sabali sakbayda a naidasay.

Nagarudok ti maysa a kadua nga immasideg. Ni Ka Jayson.

β€œKa Rene, adda sugatko iti abagak,” kinunana kaniak. β€œAdun ti nagsayasay a darak. Agkapsutakon. Agatraskan.”

β€œKasanokan, Ka Jayson?” nakunak.

β€œSiak ti manglapped kadakuada bayat ti panaglibasyo.”

Pinisel ni Ka Jayson ti imak. β€œInkayon,” nakunana. β€œNo makalasatka, ikarim a sumukokan iti turay. Mangabaruananka. Awan ti masakbayam iti Tignay.”

β€œApay a kasta unay ti panangisakitmo kaniak..?”

β€œG-gapu ta patpatgenka, Ka Rene. Inkayon ita ta di pay makaasideg dagiti soldado.”

Diak nagawidan ti panagtedted ti luak. β€œApay kadi nga agpipinnatay dagiti agkakailian? Ania kadi ti husto nga ilablabanda? Ideolohia? Panirigan? Kapanunotan,” nakunak nga agsasaibbek.

(Maigibusto)