INDAYON NI LAGIP: Dagiti Piglat iti Biagko (Umuna a paset)

Naawis met daytoy riknak a mangisalaysay dagiti padasko a nagbalin a piglat iti biagko.

Manong, siak ni Noraly Santos, agtawenak itan iti 32 ken residente iti Paoay, Ilocos Norte.

Tawen 1977, sikognak pay laeng daydi nanangko idi agtalaw ti amak gapu ta saanda nga agkasunguan ken ni lolangko. Adu kano ngamin ti bisio ni tatang, kas iti babai, sugal ken arak.

Nagtalaw met daydi nanangko tapno agbirok iti panggedanna ta adda usarenna iti panangipasngayna kaniak. Naipadpad iti maysa nga ili ditoy Ilocos Norte. Ngem daksanggasat ta idi ipasngaynak, saan a nalapdan ti mammaltot ti panagpadarana ket saanen a naiyabot ti biagna iti ospital.

Inyawidnak  kano ti maysa a baket nga agnagan iti Nana Tinay.  Ngem awan pay makabulanko kenkuana  inpaamponnakon  kada Nanang Marie ta awan kano ti igatangna iti gatasko.  Ni ngarud Nanang Marie ti napuotak nga ina.

Idi agtawenak iti lima mariknakon a kasla dinak patpatgen ni Nanang Marie. Saan nga anak ti nangibilanganna kaniak no di maysa a katulong laeng.

Wen, Manong Danny, pasaray didak pakanen ken uray no kasano ti kapigsa ti tudo ken kimat ket ibaondak a mangiyawid iti baka a nakawayway iti talon.  Adda pay naminsan a saanko a naiyawid a dagus ti baka ket nasipngeten idi makaawidak ngem nakarikepen ti ridaw ti balay ket dinak pinastrek ni Nanang Marie. Dina patien a sinawarko ti baka gapu ta nakagarut isu a naladawak a nakaawid.

“Salbagka nga ubing, maturogka dita sirok ta gunggonam!”┬á kinunana ketdi.

Awan naaramidak, Manong, no di naturog iti sirok. Agkutkutimermerak a nagkukot iti suli. Inanusak ti nagpatnag a pannakalamokko. Namrayak a pinispisel ti tianko gapu iti bisinko.

Idi innem ti tawenkon, siakon ti paralaba, agluto, agsakdo iti danum ken agdalus iti balay.

Iti dayta a kinaganusko a pannakaipangetko iti trabaho, inap-apalak dagiti kaarrubami no kasdiay a mangegko ti timekda nga aggaayam iti paraanganda. No adda koma met da Nanang ken Tatang, saanak koma a maturturtoran iti trabaho, nakunkunak iti nakemko. Nupay kasta, inanusak dagitoy agsipud ta inkari ni Nanang Marie a pagadalennak.

Wen, Manong Danny, bassit laeng a biddutko, pungot wenno baut ti sagrapek a dusa manipud iti imbilangko nga ina. No madanon ti rabii ket agiddaak, diak malapdan ti panagarubos ti luluak. Uray no naganusak pay, adda metten riknak a masaktan.

(Adda tuloyna)