Footer

INDAYON NI LAGIP: Dua a Babai iti Biagko (Tuloyna)

Kalpasan ti panagarinsaed ti bara iti nagbaetanmi, nagsangit ni Kristal iti barukongko. Dinan kayat ti aggawid.

Idi la a naamirisko ti kadakkel ti biddut a naaramidko. Inlunodko ti bagik, Manong Danny, no apay a diak nateppelan ti bagik ket inikutak ni Kristal. Diak ammo ti aramidek. Diak ammo ti isungbatko ken ni Kristal.

“Saannakon nga aggawid,” inulit a binalikas ni Kristal. “Kalpasan ti naaramid, awanen ti rupak a sumarang kadagiti dadakkelko.”

Ad-addan a diak ammo ti aramidek. No ipalgakko ti kaaddan ti asawak, amangan no ageskandalo ni Kristal. Manen, inlunodko ti kinarukopko. Dandaniko payen itubtob ti ulok iti kongkreto a pader ti otel a yanmi.

“Please, sungbatannak, Roman,” kinuna ni Kristal.

“S-saanta pay a mabalin ti agkasar ita,” nakunak. “Agurnongak pay iti pagkasarta.”

Adu nga ay-ayok kenkuana sakbay a napaannugotko nga aggawid iti kaserana. Ngem sakbay a pimmanaw, immarakup kaniak sana inyarasaas a no saanko a tungpalen ti karik kenkuana, gudasenna laengen ti biagna.

Nagkintayegak, Manong Danny. Sinidirnak ti konsensiak. Ngem ania pay ti maaramidko? Uray an-annuek, saankon a maisubli ti kinabirhen ni Kristal. Siak ti umuna a lalaki a naglasat iti biagna.

Intulodko ni Kristal iti paradaan ti traysikel. Kayatna nga itulodko iti kaserana ngem impambarko nga agsubliak iti pagtrabahuak ta adda pay ikamakamko. Ngem kinapudnona, amkek amangan no adda makakita kaniak iti panangitulodko kenkuana. Kasta met nga amangan no malipatak manen ti bagik no awisennak nga umuneg iti kaserana.

Iti dayta nga agpatnag, inalimbasagnak ti amakko iti pagtungpalan ti naaramidko. Dua a ladawan ti agsinsinnublat nga agparang iti panunotko: ni baket ken ni Kristal. Ania ti aramidek?

Addayta ti ladawan ni baket. Mangipatpateg. Nadungngo. Pagwadan nga ina.

Iti sabali a bangir, addayta ti ladawan ni Kristal. Kalaslasbanganna. Kaarigna ti sabong nga agin-inakbay ti ayamuomna iti panagukradna.

Dua a babai. Duada nga ipatpategko.

Kasanon no maammuan ni baket? Sigurado a sidirennak gapu iti panangliputko kenkuana iti baet nga ipatpategnak.

Ngem no isinak ni Kristal, amangan no adda dakes nga aramidenna. Wenno daytoy ti puon ti pakadadaelan ti panagadalna.

Sakbay nga aglawag, inkeddengko ti bagik nga in-inutek ti agikay ken ni Kristal.  Daytoy ti makitak a kasayaatan a solusion iti problema a nakaipasungalngalak.

Manipud idin, no sumarungkar ni Kristal, saankon nga inasikaso nga ania, Manong Danny. Impambarko a nabuntuonannak iti trabaho. Idi bumaybayag, saannakon nga agparang kenkuana. Aggianak lattan iti uneg agingga iti pumanaw.

Naminsan, inawisnak a rummuarkami ta adda kano pagpatanganmi.

“Diak makapanaw ditoy estasion,” impambarko.

“Naumaka kadin kaniak?” kellaat a sinaludsodna.

“Apay a kasta ti saludsodmo?” nakunak.

“Dakkel ti nagbaliwam. Gapu kadi ta naalamon ti kayatmo kaniak?”

Diak dagus a nakasungbat, Manong Danny. Ngem sakbay a nakasungbatak, agluluan a pimmanaw ni Kristal.

Diak manen nateppelan a di inlunodko ti bagik, Manong Danny. Ammok a nasugatko ti rikna ni Kristal ngem masapul nga aramidek daytoy ita ta nasapa pay, ita ta saankami pay unay a nailumlom iti basol. Ammok a nasaem ken ni Kristal ti yaadayok ngem ubing pay ket mangnamnamaak a malipatannakto met laeng. Iti dayta a pintasna, makasarakto iti lalaki nga awan ti nakaigalutanna a mangipatpateg kenkuana agraman ti napalabasna.

(Adda tuloyna)