Footer

INDAYON NI LAGIP: Dua a Babai iti Biagko (Tuloyna)

NAGLABAS dagiti aldaw. Saanen a nagparang pay ni Kristal iti pagtrabtrabahuak. Uray mensahena iti selpon, awan.

Naamirisna ngatan nga awan ti nasayaat a turongen ti relasionmi? Wenno addan nasarakanna a sabali nga ayat?

Aniaman kadagitoy, dakkela nakagin-awaak. Malipatannakto ni Kristal, nakunkunak iti nakemko.

Ngem maysa nga aldaw, nakaawatak iti surat manipud ken ni Kristal. Umaynak kano pasiaren iti pagtrabahuak tapno agpatangkami iti nalapat. Kayatna kano ti sumurot kaniak no aggawidak iti lugarmi.

Nagkaling-etannak iti dayta a nabasak. Ad-adda manen a dumakes no maammuan ni Kristal nga addan pamiliak. Saan laeng a dayta, adda la ketdi maparnuay nga eskandalo no maammuan ni baket nga adda sabali a babai iti biagko.

Nairana idi nga anibersario ti pagtrabtrabahuak ket naragsak iti aglawlawko. Ngem imbes a makipagragsakak, nagpaigidak tapno pumanunotak iti aramidek a saan a masaktan ni Kristal.

Ngem nalpas ti programa nga awan ti uray anniniwanna a nakitak. Nakaangesak iti nalukay. Mabalin a nagbabawi ni Kristal iti panggepna.

Nasapaak a naggawid iti kaserak. Ngem riribukennak ti pagturongan ti relasionmi ken ni Kristal. Kaarig ni Kristal ti alinuno a mangalun-on ken manglemmes kaniak no diak rumkuas a lumangoy nga umadayo.

Adda nagtuktok iti ridaw. Idi inlukatko, naitangngua ni Kristal. Rimmapis. Saanna a maiperreng dagiti matana. Ngem ammok a nagsangsangit.

Aglulua nga immarakup kaniak. Iti ballaet dagiti saibbekna, kinunana a samsam-itenna ni patay ngem ti mayadayoak kenkuana.

Nagkintayegak.

“Saan, dimo aramiden dayta!” nakunak.

“Sawem nga ay-ayatennak… a dinak adaywan…” nakunana.

Sinapul ti bibigna ti bibigko. Nabayag a nagdingpil dagiti bibigmi.

“Ay-ayatenka unay…. unay…” nakunana idinto nga immirut ti arakupna.

Napakidemak ta mangrugi manen a lumupoy ti pakinakemko. Saan, saan a maulit manen ti panagbasolmi, nakunak iti nakemko.

Nagsinnungbangir a tinengngelko ti abagana. Inyadayok ti rupak.

“Lipatennak koman, nakunak. “P-pakawanennak… Nagulbodak….”

“Ania ti kayatmo a sawen?” pinerrengnak.

“Dakkel a babak ti naaramidko kenka… saan a pudno a baroak… Addan asawa ken anakko.”

“Dinak koma ang-angawen…”

“Pudno ti ibagbagak. Addan pamiliak.”

Pinerrengnak iti nabayag ni Kristal. Idi agangay, nagrisud kenkuana a pudno ti sasawek.

Iti apagdarikmat, timmayab ti dakulapna ket nanalpaak ti agsumbangir a pingpingko. Urayak la naariweng.

“Ulbod! Inallilawnak!” kasla gurruod ti timek ni Kristal iti panagdengngegko.

Kalpasanna, agsangsangit a timmaray a rimmuar iti kaserak.

Nabatiak a mangap-apros iti pingpingko. Ngem diak nakarikna iti pungtot. Ti ketdi bagik ti kinagurak gapu iti pannakadadael ti biag ni Kristal.

(Adda tuloyna)