Footer

INDAYON NI LAGIP: Dua a Babai (Maudi a paset)

“Sadino ti lugaryo, pari, ta umayak dita ta agsaritata,” dinamagna.

Saanko nga impalgak ti lugarmi.

Kunak no agpatingga ditan. Ngem kabigatanna, maysa a mensahe ti naawatko a naggapu iti maysa a babai nga agnagan iti Myriam.

“Puwede bang maki-bf o mahalin?” nasutil a mensahena kaniak.

Sinungbatak  ket dita a nangrugi ti panagpagayammi babaen ti teks. Ngem ti nakakellaataqk, inawisnak nga agkitakami iti plaza ti San Fernando City. Kasano daytoyen? nakunak iti nakemko.  Madi ti agparparikna kaniak. Di pay nabayag a nagam-ammokami, agsarakkamin ti kayatna.

Alusiisennak iti kinaagresibona. Uray adalemen ti rabii, tumawag kaniak iti selpon. Nariwet pay ti parbangon, addaytan ti teksna a mangkabkablaaw kaniak.

“I love u! I miss u!” sangkakunana.

Sangkaawisnak nga agsarakkami iti San Fernando. Ngem nagpambarak nga adu ti pakakumikomak. Nupay kasta, imbagak kenkuana a dumtengto ti aldaw a panagkitami iti personal.

Ngem iti panaglabas ti aldaw, nakariknaak iti panagduadua ken ni Myriam. Adda ngamin dagiti pagkaingasan ti wagas ti panagteksda ken ni Sally. Adda bimmangon a suspetsa iti panunotko. Ni Sally ken ni Myriam, agmaymaysa?

Naawis ti riknak a mangtakuat iti maul-ullom a panagsuspetsak. Inkeddengko nga agkitakami ken ni Myriam.

Idi inyawisko kenkuana nga agsarakkami ditoy Tagudin, dagus nga immannugot. Nobiembre 9 ti nagtulaganmi a petsa a panagkitami. Sapaenna kano ti agrubbuat manipud iti Luna, La Union. Ad-adda a napatalgedan ti suspetsak. Taga-Luna, La Union ni Sally.

Awan pay alas dies, addaakon iti waiting shed iti asideg ti Shell Station. Ni Mark ti imbaonko nga agtakder iti sirok ti algarruba iti amiananen ti gasolinaan. Saan koma a kayat ni Mark ngem napaluknengko babaen ti karik a dua a case a beer ken pulotan a kalding.

Nupay, impaganetget ni Myriam nga agkawesak iti nalabaga a t-shirt ken nangisit a pantalon, nagbadoak ketdi iti puraw ken nagmaongak. Kasta met ken ni Mark. No agpayso ti suspetsak, diak kayat a maisagmak ti gayyemko.

Naganit-it ti selponko. Naggapu ken ni Myriam. Lumabas kanon ti luganna iti pagadalan sekundaria ti Tagudin. Napanak nagtugaw iti abay ti maysa a baket nga agur-uray iti luganna nga agpaabagatan idinto a intawagko ken  ni Mark ti panagsaganana.

Madamdama, maysa a babai ti dimsaag iti sakbay ti kurba a sumrek iti uneg ti ili. Nagtalangkiaw ti babai sakbay a bimmallasiw.

Naamilko ti bibigko idi makitak ti pakabuklan ti babai. Kimmepkep ti patongna iti maong a pantalonna. Nabaknang ti barukongna. Nupay naka-anteohos, agminar latta ti kinalapsatna.

Nakariknaak iti panagbabawi. No isu ni Myriam, saannakon nga agpangadua a paigalut.

Ngem idi asitgan koma ni Myriam ni Mark, kellaat a nagparang ti maysa a lalaki. Ginammatanna ti babai. Nagwagteng ti babai idinto a ngimmato ti timekda a dua.

Sineniasak ni Mark nga umadayon.

Pinagandarko ti motorsiklok a nakaparada iti abay ti waiting shed ket apaman a nakasakay ni Mark, pinataraykon ti lugan.

Iti dayta a rabii, timmawag ni Myriam kaniak. Kinunana a desididon a makisina ken ni lakayna. Awan kano ti serserbi ni lakayna. Saanko a sinungbatan.

Simmaruno ti tawag manipud iti maysa a lalaki ket binallaagannak nga adaywak ti asawana.

Insungbatko nga awan ti pagdanaganna ta awan ti panggepko a mangrakrak iti pagtaenganda. Imbagak pay a suktakton ti numerok tapno saanen a makateks ni Myriam kaniak. 

Ngem idi kitaek ti nagparang a numero, naklaatak ta ti met gayam asawa ni Sally. Nagrisud iti isipko: agmaymaysa da Sally ken ni Myriam!

Diak ammon no ania ti nagbanagan dagiti agasawa. Ngem naammuak iti maysa a kalugaran ni Sally a nagsina dagiti agassawa. Pimmanaw kanon ni Sally ket dida ammon ti nagturonganna. Naammuak pay a lupes gayam ti lalaki ket saanda a maaddaan iti anak ken ni Sally.

Dayta ngata ti gapuna a kayat ni Sally (wenno Myriam) ti makirelasion kaniak?

Ala ditoyen ti pagpatinggaan ti maysa a paset ti pakasaritaan ti biagko, Manong Danny. Agyamanak no adda man maitedna a leksion kadagiti padak a lalaki.

       Toy pagayammo

               Pretty Boy