INDAYON NI LAGIP: Iti Nagkurusan ti Biagko (Tuloyna)

Hunio 23, 2008 ti panagkasar da Jayson ken ni Lenny. Kasla nagmanto kaniak dayta nga aldaw. Inay-ayko ti bagik. Kaslaak la gaga a nagur-uray ngem sabali met gayam ti pagtinnagan ti lalaki nga ay-ayatek.

Naammuak nga idi aggawid ni Jayson ditoy probinsia, nagranada ken ni Lenny iti terminal ti lugan nga agpa-Ilokos. Agsipud ta nasinged a pagayamko, inawis ni Jayson ni Lenny a mangaldawda sakbay ti panagluas ti lugan.

Ngem napardas dagiti pasamak. Idi agbalaw dagiti dua, addadan iti uneg ti maysa a motel.

Saanen a pinalusposan ni Lenny ni Jayson. Impangtana a patayenna ti bagina no saan nga ibanag ni Jayson. Banag a nagbutngan ni Jayson.

Nupay saanak a naimbitaran, timmabunoak iti kasar. Kayatko a makita ti patpatgek iti maudi a gundaway sakbay a maigalut iti babai nga ammok a dina patpatgen. Kayatko a salangaden ni Jayson gapu iti kinarukopna iti sanguanan ti sulisog.

Awan pay ti nobio ken nobia idi sumangpetak iti simbaan. Naiturong dagiti mata kaniak idi mapanak agtugaw iti asideg iti sango. Adda dagiti gagayyemko a makaammo iti kaadda iti relasionmi ken ni Jayson. Mabalin a masmasdaawda no apay nga addaak iti kasar ti lalaki a nangtallikud kaniak.

Immuna a simmangpet ni Jayson. Bimsag idi makitanak. Pinilitko ti umisem idi umasidegak.

Ngem anian ta agkaratukot metten ti tumengko idi gandatek nga iper-ak dagiti insaganak a balikas a naullom iti barukongko. Diak gayam maaramid ti ageskandalo iti kasar ti patpatgek. Adda pay nabatbati a respetok iti bagik.

Pinatalinaayko ti riknak ket immasidegak kenkuana.

Happy wedding,”nakunak ket diak ammo no nadlaw ni Jayson ti panagtigerger ti timekko. Inyawatko ti imak.

Nabayag a minatmatannak ni Jayson sakbay nga inawatna ti dakulapko.

Agyamanak ta immayka,” nakuna ni Jayson. “Ammok a dakkel ti nagbasolak kenka. Agbabawiak ngem diakon makaakkal ken ni Lenny. Pakawanennak…”

Saan a dayta ti immayak,” nakunak. “Umayko imatangan ti pannakaitanem ti maysa a saan a mapagkammatalkan nga ayat. Agyamanak ketdi ta ita ta nasapa pay, nakitak ti pudpudno a kinatao ti lalaki nga impatpategko!”

Saankon nga inuray ti isungbatna, Manong Danny. Nagpusiposakon ket rimmuarak iti simbaan.

Idi addaakon iti paradaan ti lugan nga aggawid, diakon nagawidan ti luak.

(Adda tuloyna)