Footer

INDAYON NI LAGIP: Makapagsakripisio ni Ayat (Maudi a paset)

Iti dayta a rabii, nagsasangokami kada Marlon iti barangay hall.

Nagpakawan ni Marlon gapu iti inaramidna.

“Desididoak a mangitakder iti inaramidko,” kinunana. “Uray agkallaysakamin ken ni Marlyn no umannugot.”

“Ania ti makunam, balasangko?” inamad ti barangay kapitan.

“No maikarikami, tinongentayon ti kallaysa tatta a rabii,” kinuna ti ama ni Marlon. “Ania ti makunam, pari?” tinaliawna ni tatang.

“Saanmi a bibiangan ti pagayatan ti anakmi,” insungbat ni tatang. “Itedmi kenkuana ti wayawaya a mangikeddeng. No ania ti kunana, isu ti masurot.”

Naiturong amin a mata kaniak. Immangesak iti nauneg.

“Pakawanek ni Marlon iti inaramidna,” insungbatko. “Ngem iti sanguananyo, putdek metten ti relasionmi. Itedkon kenkuana ti wayawaya a bumirok iti sabali.”

Saan a nakatimek ni Marlon.

“Agyamanak ketdi ta ita ta nasapa pay, nakitakon ti pudpudno a kinatao ti lalaki a nangitalekak iti ayatko. Nagbiddutak gayam a nangitalek iti ayatko kenkuana.”

“Dinak la kadin mapakawan?” nakuna ni Marlon. “Naaramidko daydiay gapu iti pammategko kenka.”

“Ti ayat, kas iti bunga a masapul a paluomem iti pammateg tapno agbalin a nasam-it,” nakunak. “Naamiriskon a saantanto nga agkatunosan no agtipontan iti maymaysa a balay. Isu nga ita ta nasapa pay, putdentan ti karita iti tunggal maysa.”

Timmakderak. Timmakder metten ni tatang sa nagpakada ken ni barangay kapitan.

Iti dayta a rabii, sinangitak ti nagbanagan ti ayatko…

Ditoyen a gibusak ti pakasaritaan ti ayatko, Manong Danny. Ngem sakbay a pumakadaak, kayatko nga ibaga a sangsangpetmi ken ni Steve manipud iti Hawaii a nagbakasionanmi iti nasurok tallo a bulan.

Wen, sinungbatak ni Steve kalpasan ti dandani makatawen a panagdatonna kaniak. Iti dayta a naunday a panawen, saan a nagliway a nangipamatmat ti pammategna. Naimpusuan ti panagayatna, banag a diak nakita ken ni Marlon.

Kalkalpas laeng ti panangselebrarmi iti umuna a tawen nga anibersario ti kasarmi. Adu ti sangaili ni lakay a taga-ili. Dandani met nakumbidar amin a kalugarak.

Diak nakita ni Marlon. Ngem maysa a gayyemko ti nangikissiim nga adda metten asawana, ni Ising, kalugaranmi met laeng. Kas iti dati, makitaltalonda pay laeng.

Iti daytoy a panagawidmi, adda livelihood project, kas iti panagtaraken iti dingnguen, a kayatko nga irusat para kadagiti kalugarak a babbai tapno adda kanayonan a pamastrekanda. Nakapatangkon ni lakay ket nakasagana met a mangipuonan iti livelihood project nga irusatko. Kinunana pay a no makitana a nasayaat ti pannakaimaton ti proyekto, madadaan pay a mangnayon iti puonan dagiti kalugarak.

Kastan, Manong Danny, naimbag a malemmo.

Marlyn