Footer

INDAYON NI LAGIP: Makapagsakripisio ni Ayat (Tuloyna)

Diak nakaturog iti dayta a nagpatnag. Alimbasagennak iti iddak. Kasla kumurkurikor iti lapayagko ti imbati ni Marlon kaniak a balikas.

Sumurotak kadi ken ni Marlon? Ay-ayatek ni Marlon. Isu ti umuna a lalaki iti biagko. Isu ti nakariknaak a maysaak a babai kadagiti darikmat a duduakami ditoy balay.

Ngem ania ti klase a biag ti bangonenmi no agtaraykamin? Awan ti pagsapulan ni Marlon no di laeng ti itutulongna iti talon a naipaima iti amana. Dandani saan pay nga umdas ti maapit iti taltalonenda a pagbiagda, anianto la ketdin no addaak ken dagiti agbalin nga annakmi a mainayon? Ad-adda laeng a mailumlomkami iti kapitakan.

Ngem no saanko a patgan, sigurado la ketdi nga adaywannak ni Marlon. Maituredko kadi a mapasamak dayta?

Kabigatanna, kinasaritanak ni nanang. Saan a nailibak kenkuana ti ibubukno ti matak.

“Adda kadi problemam, anak?” nakunana. “Ibagam koma bareng makatulongak.”

“Ni Marlon, nang, kayatnan nga agsimpakami,” nakunak.

“Ania ti desisionmo?”

“Saankami pay a sisasagana, nang. Awan pay ti urnongna.”

“Kasaritam. Aguraykayo pay bassit agingga iti adda pangrugianyo,” kinuna ni nanang.

“Dakkel ti suspetsana nga adda riknak ken ni Tata Steve.”

“Awan ti panagtalekna kenka no kasta. No ay-ayatennaka, agtalek koma a napudnoka kenkuana.”

Kalpasan ti makalawas, simmarungkar manen ni Marlon. Ngem saanko a sinango idi malang-abko nga agat-arak. Ni tatang ti nakipatpatang kenkuana.

“Ammok, kayatnakon nga isina ta adda pagtangsitna nga Esteban!” nangegko a kinuna ni Marlon.

“Saan koma a kasta ti masaom,” naalumamay ngem nabatad ti boses ni tatang. “Saan a kasta kababa ti anakmi. Saannaka a kayat a kasango ta nakainumka. Baliwamton ti sumarungkar, inton saanka a nakainom tapno makapagsaritakayo a nasayaat.”

“No dinak kayaten, saan latta! Bumirokak iti sabali!” nakuna ni Marlon.

“Nawayakayo pay la a dua ket no kasta ti kayatmo, awan ti makaipawil kenka,” nakuna ni tatang.

Maysa a malem nga ipapanko panangbalon kadagiti dadakkelko, sinaednak ni Marlon.

“Kayatko nga agsaritata iti nalapat!” kinunana.

“Nakainomka manen,” nakunak. “Agsaritatanto no awan ti nainayon nga arak iti daram!”

Kellaat, inarakupnak ni Marlon. Diningpil ti bibigna ti bibigko. Nagdakiwas ti imana iti barukongko.

Naggulagolak ket imbautko iti rupana ti basket a naglaon iti pangngaldaw dagiti dadakkelko. Nagtarayak nga immadayo idinto a nagpaarayatak.

Nangeg da tatang ti panagpaarayatko. Dinagdagusnak a sinabat. Agsangsangitak a nangipadamag iti inaramid ni Marlon.

“Ti anak-ti-sal-it!” nayesngaw ni tatang ket nagturong iti kalapaw. Idi rummuar, iggemnan ti badangna.

“Agtalnaka, lakay!” inarakup ni nanang ni tatang. “Dika koma agdardarasudos ta dikanto ket maisagmak!”

(Adda tuloyna)