Footer

INDAYON NI LAGIP: Makapagsakripisio ni Ayat (Umuna a paset)

Naimbag nga aldawmo a sangbayan daytoy suratko. Maysaak met kadagiti naruay nga agbasbasa iti kolummo a naguyugoy a mangipatulod iti pakasaritaak gapu ta makaay-ayo, mapakaray-aw ken makaited-adal dagiti pirgis ti biag a maipatpatulod kenka.

Awagannak laeng iti Cecil, agnaedak ditoy probinsiatayo nga Ilocos Sur, balo, agtawenak iti 22.

Kagapgapuk iti Hawaii. Lima a tawenkon iti Hawaii. Immayak nagbakasion itay Paskua. Kunak no agbalinak a naragsak iti daytoy a panagbakasionko ngem nagbiddutak. Rimtab ketdi ti sugat iti kaunggak a kunak no nagluniten.

Daytoy ti gapuna a nakapagsuratak kenka. Kayatko nga ipadigo ti pakasaritaak bareng adda maala nga adal dagiti makabasa iti kolummo.

Manong Danny, saan a panangibuat iti bukodko a bangko, ngem kunada man a dakkel ti pangawisko kadagiti lallaki . Napigsa kano ti sex appealko.

Rigat ti nabangonak a panagbiag. Pimmusay daydi nanang a rigat latta ti adda. Iti la haiskul ti nagpatinggaak. Kayatko koma nga ituloy ti panagadalko ngem di met kabaelan ni tatang nga isakad ti panagbasak. Adu dagiti arapaapko iti biag a kayatko a gun-oden ngem awan ti nagtungpalanna.

Idi, no saan a nagitaan a kappi a maala iti bubo ni tatang, napaksiw a saluyot wenno awan sagpawna a nateng ti sidami. Makauma met ti kanayon a kasta, Manong Danny.

“Ayna, saluyot a napaksiw manen. Awan la kadin ti sabali a pammigattayo, tang?” nakunak iti naminsan nga isasangomi iti lamisaan.

“Ania ket ni Cecil, anusam kadi, ta saantayo met a baknang. Pagyamanam laengen ta mangantayo pay iti mamitlo iti maysa nga aldaw,” kinuna ni tatang.

“Wen met, manang. Ngem adda pay tsansam a bumaknang… mangasawaka ti Hawayano,” insutil ti kabsatko nga agbasbasa iti gred siks.

Iti dayta a nangngegko, adda nagkallatit a namnama kaniak. Agpayso, no kastoy laeng, awan ti asensok iti biag. No diak makapanaw ditoy lugarmi, agpatinggaak a mailumlom iti kataltalonan.

Immangesak iti nauneg. Nakunak iti nakemko: no adda la mangayat kaniak, uray lakay, basta adda kuartana, bay-amon ni ayat!

(Adda tuloyna)