Footer

INDAYON NI LAGIP: Managrabak nga Ayat (Umuna a paset)

Dear Manong Danny

Ubingak pay, Manong Danny,
tinedierak pay laeng..

Awagannak laeng iti Darling.
Agnaedak iti maysa nga ili ditoy Ilocos Sur.

Diak kunaen a napintasak, ngem
napudawak ketdi. Agtayagak laeng iti lima a kadapan. Atiddog ti
buokko. Kuna dagiti gagayyemko a nasam-it ti isemko.

Nangrugi ti naidumduma a padasko
idi bulan ti Marso idi napan a tawen, Manong Danny. Adda naam-ammok a
kataebak babaen ti text. Dua laeng nga ili ti baet ti ilimi a dua.
Jerry ti naganna.

Diak ammo no nangalaanna iti
number ti selponko. Kinunana a naalana iti radio, iti DZTP Radio
Tirad Pass, iti programa a Music Maestro ni Benjie Ibe. Ngem awan ti
malagipko a nagkiddawak iti teksmeytko babaen ti tangatang ken
nangitedak iti numero ti selponko. Nalagipko ketdi nga inyangaw iti
naminsan ti gayyemko a bakla nga ibirokannak iti kateksmeytko. Isu ti
atapek a nangipatulod iti numerok. Ngem gapu itoy, nagadu metten ti
mangteteks kaniak a mangkablaaw kaniak iti “Hi”, “Hello”,
“How r u?”, “muzta”, “swit k ba?” ken dadduma pay nga
agkakasam-it a balikas.

Awan sinungbatak kadakuada, ta
diak kayat ti makiteteks.

Ngem naidumduma ni Jerry, Manong
Danny, ta isu ti kaanusan kadagiti mangteteks kaniak. Uray diak
sungbatan, agsasaruno dagiti ti teksna. Iti las-ud ti pito nga
aldaw, adda latta teksna uray awan ti sungbatko.

Gapu iti kinapingetna, maysa nga
aldaw, sinungbatak.

“Tnx sa lht
ng txt mo. Na-recib ko lahat,” inteksko.

Naparpartak pay ngem alas kuatro,
addadtan ti sungbatna. “Hay slmt, ng-txtbak ka rin. An tgal ko
hinntay.”

“Naanus ka
ngmin,” kunak met.

“Kstanak
ngmin, napunnoak iti anus. Ta isu la ti adda kaniak,” insungbatna.

Dita ti nangrugianan ti
panagtinneksmi. Kanayon a pumanippip ti selponko. Pimmartak payen ti
tammudok nga agitalmeg kadagiti letra.

Very sweet ni Jerry, Manong Danny.
Awan ti gundaway a dina iparikna daytoy kaniak.

Kumain
ka naba?

Yap

O, Ingat lang, bka mabilaokan
ka. Ano ulam mo?

Sinigang na bangus

An sarap naman. Pag anjan ako,
subuan kita

Ay ayoko nga, baka makagat ko
kamay mo

Ok lang, basta nakikita kong
masarap kang kumakain. Gusto mo kantahan din kta habang kumakain ka.

Puwede ba yun?

Oo naman, tatawagak ako ha.
Then, i-loudspeakermo.

Madamdama pay, nagkiriring ti
selponko. Idi sinungbatak, rinugianna metten ti agkanta. “Kailangan
Kita” ni Ogie Alcasid.

Nalamuyot ti bosesna, Manong
Danny. Ayna, imbes a pumardas ti pannanganko, bimmayag ketdi. Ne,
apayen a pumartak metten ti pitik ti pusok? nakunkunak iti nakemko.

Maysa a rabii, nagteks manen ni
Jerry, Manong Danny. Diakto malipatan dayta a rabii. Agnanayonto a
nakakur-it iti pusok.

Darling,
ang swit talaga ng pangalan mo.

Uy, hindi lang pangalan ang
swit sa akin.

Alam ko, maganda ka rin.

Ay hindi rin, cute lang
siguro. Naks.

Kaya nga siguro na-iinlove ako
sa’yo, Darling.

Ha, nagproproprose ka ba?

Hindi, sinasabi ko lang ang
feelings ko sa’yo. Baka kase hindi ako bagay para sa iyo. Masyado
kang cute…

Ay, nag-emote, ikaw nga diyan,
e. Ang lambing ng bosesmo. Lalo na pag Ogie Alcasid ang kinakanta
mo, naku, ang sarap pakinggan. Marami ka na sigurong nabingwit sa
boses mo.

Para sa’yo lang talaga ang
boses na iyon, hindi ako magsasawang kantahan ka. Pero, mahal mo rin
ba ako? Please… I need to…

Tut! Tut!

Ayna, Manong Danny, naibusan
ketdin iti load. Sapay no di sungbatak koma metten. Siguro, saan
pay a daytoy ti umiso a gundaway, nakunkunak iti nakemko. Ngem ammok
a tumawagto manen.

Wen, Manong Danny, maay-ayoak iti
napintas a bosesna. Ken mariknak, matinnagen ti pusok kenkuana.
Mariknak a diak metten mapagelan daytoy pusok nga agayat kenkuana.

Manipud idin, tunggal sakbay nga
agpakada iti rabii, sangkaibagana iti teksna ti “I Love You”,
“Sweet Dreams”, “Take Care”, “Aalagaan kita”.

Dagitoy a balikas ti saan a
mangpaturog kaniak kadagiti rabii. Saludsodek iti bagik: siak met la
ngata ti tagtagainepenna ita a rabii? Siak met laeng ti arapaapna a
kaarakupna iti agpatnag?

Naikeddengkon a sungbatan ni
Jerry, Manong Danny. Ngem kayatko a personal a mismo nga iyawat ti
pusok kenkuana.

Inkalikagumko ngarud ti
panagsarakmi, Manong Danny. Imbagak kenkuana nga itedko ti sungbatko
iti panagkitami.

Intudingko ti aldaw ti Domingo a
panagsarakmi iti plasa ti Candon.

(Adda tuloyna)