Footer

INDAYON NI LAGIP: Nagkurusan (Umuna a paset)

Maragsakanak ta addakayo latta babaen daytoy kolummo a pakabasaanmi kadagiti linmbag ti napalabas a mabalinmi a pagsarmingan iti panangtaluntonmi iti nasiit a dalan ti biag.

Awagannak iti Maricel, agnanaedak ditoy probinsia ti La Union. Agtawenak iti duapulo ket innem, addaanakon iti asawa, ni Rodel.

Makunak a saankami a marigrigat, saankami met a nabaknang. Kunaenta laengen nga addakami iti nangatngato bassit a tukad ngem dagiti maibilang a marigrigat. Kinapudnona, napagturposnak met ti amak iti kurso a BSBA ngem saanko nga inaramat. Maysaak a clerk iti maysa a negosio iti San Fernando City. Nupay kasta, tunggal lawas nga aggawidak iti lugarmi.

Naam-ammok ni Rodel iti maysa a kasangay ti kaopisinaanmi. Iti umuna a panagkitami, nakayawannakon kenkuana. Uray isu, inlatakna kaniak (idi agnobiokamin) a nagpigsa ti datingko (daytoy ti inaramatna a balikas) kenkuana idi masirpatnak.

Manipud idin, masansanen nga agpasiar ni Rodel iti kaserak. Naragsak a kapatpatang ni Rodel. Adu dagiti estoriana a nakakatkatawa. Daytoy pay ti maysa a sagudayna a nakatinnagan ti riknak kenkuana.

Tallo laeng a bulan, inawatkon ti ayatna. Nagbalin a namaris dagiti aldawmi. Masansan a mapankami agpasiar iti igid ti baybay, agbuya iti sine, agpallailang iti mall.

Inawisko iti balay tapno iyam-ammok kadagiti dadakkelko. Ngem nagkedked ni Rodel. Kinunana a santon umay idiay balay no kiddawennan kadagiti dadakkelko ti panagkallaysami.

Maysa nga aldaw, naranaanna nga agmaymaysaak iti kaserak. Diak ammo ngem iti dayta nga aldaw, nakapigpigket ti panangmatmat ni Rodel kaniak.

“Apay a kasta ti panangkitam kaniak? Adda kadi uging iti rupak?” sinaludsodko.

“Nakapimpintaska man ita,” insungbatna.

“Sigud met a napintasak, saan kadi?” insutilko.

“Naidumduma ti kinapintasmo ita,” kinuna ni Rodel sana iniggaman ti imak. In-inut a ginuyodnak. Nagdennes ti barukongmi.

Nariknak ti nabara a sang-aw ni Rodel iti tengngedko ket madamdama, diningpil ti bibigna ti bibigko. Kellaat, nagkarayam ti rinibu a koriente iti sibubukel a kinataok.

“Saan, Rodel, baka sumangpet da Cecil,” nakunak a ti kakaseraak ti dakdakamatek.

Ngem kasla awan ti nangeg ni Rodel. Immirut ti arakupna idinto nga inagkannak manen. Nabayag. Napakidemak. Diakon napuotan a nayagus ti riknak.

(Maituloyto)