INDAYON NI LAGIP: Nasasaem ti sakit iti kaunggan (Maudi a paset)

Madamdama, addaytan da Uncle Ladio ken ni Anti. Kaduada ni lakay. Nadamagda metten ti napasamak.

Impudnok a kagapgapu ni Manang ditoy balay ket pinaayko ti kiddawna a sarungkarak ni Amang sakbay ti ipupusayna.

Iniggaman ni Uncle Ladio ti imak. “Anak, ammok, maawatak ti adda a kaririknam. Uray siak, kasta met siguro ti aramidek no siak ti adda iti biangmo. Ngem uray kasano kinadakes ti amam, amamto latta. Saanmo a maiwaksi dayta a kinapudno.”

“Pinadakkeldaka a naimbag a Kristiano,” kinuna met ni Anti. “Ammomi nga iti baet ti amin, adda pay nabatbati a sangkapirgis a panangipategmo iti amam. Dimo koma itulok a sallukobannaka ti guram iti amam. Pukawem ti gura iti barukongmo tapno sumangbay ti kappia ken natalna a nakem kenka.”

“Ala, agsukatkan. Uray dayta pammakawanmo ti itedmo ken ni Amangmo sakbay a sumina ditoy biag,” kinuna met ni lakay.

Nabayag a minatmatak dagiti tallo a tao nga ipatpategko iti biag. Naglalangoy manen ti luak ta nagasatak gayam a parsua gapu iti kaaddada a mangipatpateg kaniak.

“I-intayon…” nakunak. “Ur-urayennak ni Amang….”

Managsaggaysan ti anges ni Amang idi sumangpetkami iti ospital.

Rimmaniag ti rupa ni Manang idi makitanakami. Nakair-irut ti arakupna.

“Amang, addan ni ading…,” sinagid ni Manang ti dakulap ni Amang.

Minatmatak ti lalaki a nakaidda iti katre. Daytoy kadi ti amak nga ingget baked ti pammagina idi? Sabalin daytoy a tao. Lalaki nga in-inut nga imbual ti kinapanglaw.

Nagbingngi ti bibig ni Amang. “S-sika dayta, Melba…?” kasla adayo ti naggapuan ti timekna.

“W-wen, Amang,” nakunak idinto a nagtugawak iti pingir ti iddana.

“N-naimbag man ta immayka, balasangko…. uray iti baet ti kinadakesko nga ama…”

“Dimo koma panunotenen ti napalabas, Amang. Lipatenta koman ti napalabas.”

“P-pakawanennak, anak. Sika ti nagdas-alan ti lunodko iti pannakatay di inam…”

Nagtigerger ti bibigko. Diak manen malapdan dagiti luak.

“Ngem no ammom la koma ti dakkel a babawik gapu kadagiti impalak-amko kenka…. No ammom la koma ti panangilunodko iti bagik gapu ta sika ti nagdas-alan ti lunodko…”

“Dika unay agsao, Amang, ta makadakes kenka…” nakunak.

“No ammom la koma a namin-adun a ginandatko ti umay idiay balayyo tapno dumawatak iti pammakawan. Ngem saanko nga intuloy, anak, ta nagbutengak amangan no ipanalpaakmo ti ridaw iti rupak….”

“A-apay a dimo imparipirip ken ni Manang… silulukat koma ti ridaw kenka, Amang…” nagtigerger ti timekko.

Nariknak ti yiirut ti piselna iti dakulapko.

“A-agyamanak, anak, ta pinakawannak. Naragsakakon a matay….”

Dayta laeng, in-inut a limmukay ti piselna ket madamdama, inkidemnan ti matana….

Manong Danny, no la koma imparipirip ni Amang…. Ngem saantayon a maisubli ti napalabas. Nupay kasta, naragsakakon agsipud ta nagsinnublikami nga agama sakbay a simmina iti biag.#