INDAYON NI LAGIP: Nasasaem ti sakit iti kaunggan (Tuloyna)

Inyawidnak ni Uncle Ladio iti balayda tapno sadiay a paimbagek ti ukritko. Bayat ti kaaddak iti balayda, nakitak ti dakkel a nagdumaan ti pannakailangenda kaniak ken ni Anti Mameng iti panangtratar ti amak ken ti kabsatko kaniak. No kasdiay a gamdek ti tumulong iti uneg ti balay, atipaennak ni Anti Mameng ket ibagana a saan pay a naglunit ti operasionko. Anian, no kastoy koma met ti panangipateg ni Amang kaniak, saannak koma a makarikna iti napalalo a pannakailaksid ken pannakabaybay-a.

Idi malainganakon, inamad ni Uncle Ladio no kayatko ti agsubli iti balaymi.

β€œNo mabalin, aggianak pay ditoy balayyo, Uncle,” nakunak. β€œKayatko nga ituloy ti panagbasak. Uray agserbiak kadakayo ken ni Anti Mameng.”

β€œBay-am ta kasaritak ni Amangmo ta agindegka pay ditoy,” nakuna ni Uncle Ladio. β€œPagtuloyendaka a pagadalen agingga iti kabaelanmi. Kakaisuna nga awan met ti anakmi.”

Impakaammo ni Uncle Ladio ken ni Amang ti panaggianko iti balayda. Dagus nga immabuloy ni Amang.

Intuloyko ti panagbasak. Kaasi ti Dios, nangato ti promediok. Saan a panangibuat iti bukodko a bangko, adda met naggian iti utekko. Nababa laeng ti gradok iti napalabas gapu ta saan a natalinaay ti riknak iti nalamiis a pannakilangen ni Amang ken ti inauna a kabsatko kaniak.

Idi nagturposak iti sekundaria, siak ti maikadua a kangatuan a napadayawan. Nagblow-out pay ni Uncle Ladio. Nagparti iti kalding sana inawis dagiti nasinged a pagayamna. Uray da Amang ken ni manong, pinaayabanna. Ngem uray anniniwanda, awan a nakitak. Ni ketdi ading a kinuyog ti maysa nga ikitko ti immay. Nakasangitak a nakakita kenkuana. Inap-apungolko iti naglaok a ragsak ken leddaangko.

β€œAnia ti panggepmo itan ta naggraduarka?” sinaludsod ni Uncle Ladio.

β€œAgbirokak iti panggedak, Uncle, ta agurnongak pay iti pagbasak,” nakunak. β€œKayatko ti agadal iti abogasia. Dayta ti arapaapko a tun-oyen. Kayatko ti makatulong kadagiti nakurapay a kalugarantayo a mailidlidding ti kalinteganda.”

β€œNasayaat dayta a mapanunotmo,” nagtung-ed ni Uncle Ladio. β€œAla, agsaganaka ta inton umay a lawas, lumuasta nga agpa-Vigan ta agenrolka iti Law sadiay.”

β€œA-agpayso a pagbasaendak, Uncle?” kasla diak mamati iti nangegko.

β€œNangato ti promediom. Sayang laeng ti kinasiribmo no saanmo a maituloy ti panagadalmo.”

β€œNgem baka dakkel ti mabusbos, Uncle. Kapilitan nga agdagusak iti asideg ti eskuela.”

β€œDika madanagan, adda met bassit nga urnongmi ken ni Antim. Nagpatangkamin ket umabuloy met. Nasursurodakan nga impateg a kas anak ket aramidenmi amin a kabaelanmi tapno matun-oymo ti arapaapmo,” nakuna ni Uncle.

Inarakupko ni Uncle iti napalaus a ragsakko. Nakaluaak pay a nagyaman kenkuana.

Nagkatawa ni Uncle Ladio a nangpunas iti lua iti pingpingko.

β€œTi la dawatek, ilalaem daytoy a panangipategmi kenka,” nakunana.

β€œUtangko daytoy a diakto pulos malipatan, Uncle,” nakunak ket nagiinnuna manen a nagtinnag dagiti luak.

(Adda tuloyna)