INDAYON NI LAGIP: Nasasaem ti sakit iti kaunggan (Tuloyna)

Kas inkari ni Uncle Ladio, pinagbasanak iti kolehio, Manong Danny. Nangalaak iti computer technology. Dua a tawen a kurso.

Inggaedko ti nagadal ta diak kayat nga adda pamilawan da angkel ken anti kaniak. Kayatko a saanda a mapaay iti dakkel nga ekpektasionda kaniak.

Babaen ti naanep a panagadalko, nangato ti gradok iti umuna a semestre. Impaspasindayagnak ni Uncle Ladio kadagiti kalugaranmi. Ngem kaskasdi nga uray ni maysa a balikas a pangdayaw, awan ti naawatko manipud iti amak ken ni manong.

Napia ti maysa a kabsatko ta no adda wayana iti bakasionna iti Sabado wenno Domingo, umaynak pasiaren. No kasdiay, saankon a palusposan nga aggawid iti aldaw. Mangaldawen iti balaymi. Maay-ayatan met da angkel ken anti ta nasinged ti kabsatko kaniak.

“Agsingsingpetka, ading, tapno matun-oyam ti arapaapmo,” nakunana kaniak.

“Wen, Manang,” insungbatko.

“No adda la koma mabalinko, diak intulok a kasdiay ti panangtratar ni Amang kenka.”

“Maawatak ni Amang no apay a kasdiay. Siak ti nakagapu ti ipupusay daydi Inang,” nakunak.

“Saan a rumbeng a sika ti pabasolenna. Nakem ti Dios ti napasamak,” kinuna ti kabsatko.

Nagtuloy ti ilalabas ti panawen. Nangato latta ti promediok.

Naam-ammok ni Lito, agad-adal iti Engineering iti siudad. Masansan a sumarungkar iti balaymi. Nagdaton kaniak.

“Inaklonmo kadin ni Lito?” inamad ni Anti kaniak iti maysa a malem.

“Saan pay, Anti. Ipamaysak pay ti panagbasak. Makauray ni ayat. No napudno ni Lito, masapul nga urayenna a makaturposak pay.”

“Makitak ket nasayaat nga ubing ni Lito. Nadayaw. Nasayaat ti pamilia a naggapuanna. Saandaka a pengdan nga agayat. Siwawayaka a mangsungbat ken ni Lito. Dinakami pampanunoten. Naglasatkami met iti dayta. No kapkapnekam ti riknam kenkuana, apay a dimo aklonen ti ayatna? Ammomi met a kabaelam a kontrolen ti sulisog ken adda panagtalekmo iti bagim a saan nga agaramid iti pagbabawyamto iti masakbayan.”

Naarakupko ni Anti. Nakaluaak manen, Manong Danny, gapu iti kinamannakaawatna.

Inaklonko ni Lito. No bakasion, ditoyen balay ti pangaldawanna. Adda kuyogna no kua a maluto uray kasano a pananglappedko kenkuana.

Magustuan met ni Angkel Ladio ta saan la a nadayaw, ammona ti makisinninged kadakuada.

“Agbalinto a nasayaat nga asawa ni Lito. Saanmon a palusposan,” insutilna pay.

“Kayatmo kadin a mangasawaak, Uncle? Naumakan sa metten kaniak a kaludludonmo,” inyangawko.

“Saan met a sawir ni ayat ti panagadalmo. Daytoy pay ketdi ti mangted iti inspirasionmo a manggun-od iti arapaapmo iti masakbayan. Agbalin laeng a lapped ti ayat iti arapaap no daytoy ti panangipaayam amin nga atensionmo. Ngem ammok met ti reggetmo a makatun-oy iti adalmo,” nakuna ni Angkel.

Agpayso ti kinuna ni Angkel. Ad-adda a nagbalin a namaris ti aldawko iti idadateng ni Lito iti biagko. Isu ti nagbalin nga inspirasion, kibin ken salaknibko iti panagbasak.

Idi agturposak, siak ti maysa kadagiti napadayawan. Tallo a tao ti nangisagutak iti balligik: ni Angkel, ni Anti ken ni Lito.

Isuda ti nangted kaniak iti ad-adu a pigsa ken kired tapno mapurosko ti arapaapko iti masakbayan!

(Adda tuloyna)