INDAYON NI LAGIP: Nasasaem ti sakit iti kaunggan (Tuloyna)

Iti baet dagiti saibbek ni Manang, napagsisilpok dagiti pasamak. Napan nakitegged da Amang ken ni Manong iti konstruksion ti dua kadsaaran a balay ti maysa a Hawayano. Madama ti panagpalpalitada iti akinruar a pader ti balay idi natukkol ti kayo a nagbatayanda. Nakakapet ni Manong iti nagkalumbitinanna sakbay a nagdisso iti daga. Iti nakaipempenan dagiti sinako a semento ti nakatnagan ni Amang.

Intarayda ni Amang ken ni Manong iti Candon General Hospital. Segun ken ni Manang, nablo ti kanawan nga ima ken kanawan a saka ni Manong. Ngem kritikal kano ti kondision ni Amang. Awan kano ti puotna a naidanon iti ospital. Iti panangeksamen kenkuana ti doktor, naduktalan a natukkol ti akinkannawan a paragpagna.

“Kinuna ti doktor a baka saanen a mabigatan,” kinuna ni Manang. “Aw-awagannaka ni Amang. Mabalin a kayatnaka a makita sakbay a pumusay…”

Nabayag a diak nagtimek. Iti dayta a darikmat, simmiplot amin dagiti sinagrapko manipud iti amak. Iti unos ti panagbiagko, diak narikna ti uray sangkapirit a pammategna, imbilangnak a lunod ti biagna. Iti dayta a kanito, nabriat manen ti sugat iti kaunggak, adayo a nasasaem ngem iti sugat nga impalay ti katademan a tadem.

Nakitemko ti sangik idinto a diak nalapdan ti panaglulumba dagiti lua iti pingpingko.

“Ammok nga umapay manen kenka dagiti adu a nagkurangan ni Amang kenka kas anak,” nakuna ni Manang. “Ngem saan koma a dagita ti mangigawid kenka tapno taliawem ni Amang. Iti laksid dagiti inaramidna, saanmo a maiwaksi nga isu pay laeng ti amata…. a naggapuka kenkuana….”

“Agpayso…” nakunak. “Ngem saannak nga imbilang nga anak. Kayarigak ti maysa nga addaan iti sakit a makarimon unay kenkuana tapno ilaksidnak a nagtaud kenkuana.”

“Ading, dimo la kadin mapakawan ni Amang…?”

“Manang, agkiddawka laengen iti sabali ket itedko. Ngem no maipapan ken ni Amang….ladingitek.”

Pimmanaw ni Manang a nasakit ti nakemna.

Minulenglengak ti nagpukawan ti traysikel a naglugananna. Iti kamaudianan, maipariknak met laengen iti amak ti nabayagen a kitkituman ti kaunggak.

Ngem bayat ti panagtakderko iti abay ti tawa, imbes a maragsakannak ta nakabalesak met laengen iti amak, sabali ketdi ti marikriknak, diak mailadawan, diak ammo no ania a mangur-uram iti kararuak. Apay a di makatalna ti riknak?