INDAYON NI LAGIP: Nasasaem ti sakit iti kaunggan (Tuloyna)

Simmangpet ti inauna a kabsatmi a naggapu iti talon. Sinabat ni ading iti ruangan.

Manong, tulongam kadi ni Manang ket ne, agtirtiritiren iti sakit ti rusokna,” kinuna ni Dino.

Tinaliawnak ni Manong Andres. Ngem imbes a batakennak, kinusilapannak ketdi sa nagtarus iti kusina. Nangegko ti karadakad dagiti lunglongan a maitupak. Mabalin nga agbirok iti kilabban ket awan ti makitana isu a nagpupudotanna dagiti lunglongan. Nagngiaw pay ti pusa nga inkugtarna.

Nagsubli ni Manong iti kadaklan. Simrek iti kuartona a tumanabutob. Nagsukat. Madamdama, linasatna ti salas a dinak man la tinaliaw. Nadagsen ti baddekna iti kawayan nga agdan.

Nakagatko ti bibigko iti dayta a tignay ti kabsatko. Uray isu, tumukno iti langit ti gurana kaniak. Ad-addan ti panagtinnag dagiti luak. Manong Danny, nagsaem ti riknak gapu iti saanda a panangibilbilang kaniak a kabsat. Kayarigak ti lunod a nangiluod kadagiti kabbalayko.

Nabiit pay a naammuak no apay a kastoy ti panangtrato ti amak ken ti inauna a kabsatko kaniak. Naammuak laeng ti gapuna iti naminsan a nabartek ni Amang. Natay gayam ni Inang a nangipasngay kaniak. Suniak kano ket narigatan a nangiyanak kaniak. Adu ti nagsayasay a darana iti panagpasngayna a puon ti nakatayan ni Inang.

Siak ti pabasolen ni Amang ken ni Manong a nakaigapuan ti ipapatay ni Inang.

No dadduma, maawatak no apay a kasta ti panangtratar ni Amang kaniak. Ammok a nasaem kenkuana ti pannakatay ni Inang. Ngem saan koma a kasta a siak ti pangidas-alanna ti pannakatay ni Inang. Ken uray ni Manong Andres, saan koma a kayarigak ti lunod iti biagna. Ania ti basolko, Manong Danny? Nagayatak kadi ti napasamak?

Nagannayak manen gapu iti nagpaiduma a sakit ti tianko. Urayak la nagkurunikon a nangpisel iti tianko. Awanen ti namnamak nga agbiag pay iti dayta a kanito. Agsangsangit metten ni ading Jose iti sibayko.

Nariknak ti panaglamiis ti sibubukel a bagik. Matayak san, Apo! naitanamitimko.

Ading, inka sukonen ni Uncle Ladio,” nakunak ken ni Jose. Ti ulitegmi nga adda iti sungaban ti barangaymi ti kunak a papananna. Kabsat daydi tatang ni Uncle Ladio.

Mangrugin nga agkapsutak idi sumangpet ni Uncle Ladio a nakalugan iti traysikel. Idi makitana ti kasasaadko, binagkatnak ket intaraynak iti ospital. Addakamin iti dalan idi mapukaw ti puotko.

Idi imulagatko ti matak, addaakon iti ospital. Ni Uncle Ladio ti immuna a nakitak.

Ay, agyamanak ta nakapuotkan,” inamuyna ti buokko. “Dandanikan, balasangko.”

Naammuak kenkuana nga inoperadak iti apendisitis. Nabtak kanon idi maidanondak iti ospital ket no naladladaw pay, nagramaram ti sabidong iti bagik.

Immayen da Amang?” sinaludsodko.

Nagwingiwing ni Uncle Ladio. Limmidem ti rupana.

Kasanod’tan, Uncle?” nakunak. “Dakkel la ketdi ti pagbayad iti operasionko,” nakunak.

Nagpatulongak ken ni Mayor a tulongannaka ti PCSO,” kinunana.

Nakaluaak a nagyaman ken ni uliteg. Naimbag pay kenkuana ta sinaranaynak iti panagpeggad ti biagko. Ngem ti amak ken dagiti kakabsatko, dida pulos immammingaw iti ospital!

(Adda tuloyna)