INDAYON NI LAGIP: Nasasaem ti sakit iti kaunggan (Umuna a paset)

Alaek man daytoy a gundaway a mangidanon iti naimpusuan a kablaawko kenka ken kadagiti mangtartarabay iti programam nga “Indayon ni Lagip”.

Manong Danny, awagannak laeng iti Melba. Agtawenak iti l4. Agnaedak iti maysa a nasulinek nga ili ditoy Ilocos Sur. Saankon nga ilatak ti pudno a lugar a nakapasamakan daytoy a padasko iti biag ta diak kayat a masair ti rikna dagiti seknanna.

Irugik daytoy pakasaritaak idi Marso 1998. Addaak idi iti umuna a tukad ti sekondaria. Addaak idi iti balaymi idi kellaat a nagsakit ti rusokko. Urayak la agtiritir iti sakitna. Nagpaarayatak iti kaarrubami ngem nairana nga awanda ta napandan iti talon.

Naimbag ta simmangpet ti agtawen iti walo nga adiek a lalaki. Naklaat idi makitana ti langak.

Apayen, manang?” dinamagna.

Mangipapudotka iti danum,” nakunak idinto a sangkaapputko ti rusokko.

Makarkarattot ni ading a nagisaang iti danum. Pinainomnak.

Ngem saan latta a pimmanaw ti marikriknak a sakit ti rusokko. Kasla kimmaro ketdi. Madanagen ni ading.

A-ania ti aramidenta, manang?” nakunana.

Saanko a sinungbatan. Uray siak, diak ammo no ania ti aramidek.

Simmangpet ni amang.

Amang, tulongannak. Diak maibturanen ti sakit ti tianko,” nakunak.

Ngem dinak man la inasitgan ni amang uray idi makitana nga agtirtiritirak iti sakit ti rusokko. Ni sintimek ketdi a linabasannak iti salas. Kasla awan ti panangitaltalekna iti mapaspasamak kaniak.

Tulongannak, amang! Matayak san!” inulitko ti nagpakaasi ken ni amang.

Imbes a badangannak, rimmuar ketdin ni amang iti balaymi.

Nakaemko ti bibigko. Nakariknaak iti saem.

Apay a kastoy ni amang? Apay a kasla awan man laeng ti panangikankanona iti kasasaadko?

Naluyaan metten ni adingko iti asina kaniak.

M-manang, kasano itan? Pinanawannata metten ni amang,” nakuna ni ading.

Diak nateppelanen ti luak. Nasakit ti rusokko ngem adayo a nasaksakit ti saan man laeng a panangitaltalek ni amang kaniak nga anak.

(Adda tuloyna)