INDAYON NI LAGIP: Ti Ik-ikutak a Palimed (Maikatlo a paset)

Iti dayta a malem, kasla agtatapawak iti angin a naggawid iti kaserak. Nadanonko ni Elsie nga agbasbasa iti leksionna iti salas.

Sinungbatakon ni Andy,” nakunak.

I’m happy for both of you,” inarakupnak ni Elsie.

Manipud idin, basta bakasion, sumarungkar ni Andy. Mapankami mangaldaw iti restaurant, sa agpagnapagna iti igid ti baybay wenno mapan agbuya iti sine.

Maysa nga aldaw, napankami nagpallailang iti parke ti siudad. Nagabaykami iti sementado a pagtugawan ket binuybuyami dagiti ubbing nga agtataray iti karuotan.

Uppat ti kayatko nga annak,” nakuna ni Andy. “Naragragsak ti bangonenta a pagtaengan no ad-adu met la dagiti agbalin nga annakta.”

Kellaat, naglumen ti ragsakko. Nabayag a naikulengak.

Adda kadi madi a nasaritak?” kinuna ni Andy.

A-Awan,” nakunak.

Di mabayag, inyawiskon ti panagawidmi. Impambarko nga agsakit ti ulok.

Idi makapanawen ni Andy, diakon nagawidan ti riknak. Nagpaklebak iti katrek ket nagsangitak.

Manen, adtoy manen ti napalabas a mangdadael iti ragsakko. Ania ti aramidek?

Iti simmaruno a Sabado nga isasarungkar ni Andy, impambarko a saankami a makapasiar ta adda nasken nga ikamakamko a trabahok. Nasdaaw ni Andy ngem saanen a nagun-uni.

Uray dagiti tawagna iti sardam, saanko a sinungsungbatan. Iserrak lattan ti selponko.

Nabayag a tiningitingko ti riknak. Nakaikeddengak. Waswasek ti karinkarimi ken ni Andy.

Naklaat ni Andy idi ibagak nga aglinnipatkamin.

Adda kadi nakabasolak kenka?” sinaludsodna.

“”A-awan,” insungbatko.

Adda kadi sabali a lalaki a pangisukatam kaniak?”

A-awan. Naamirisko a diak gayam kapkapnekan ti riknak kenka.”

Iti dayta a malem, nagsinakami a nabantot ti barukongmi. Kayatko a kamakamen ni Andy, nga arakupen ken ibaga nga ay-ayatek ngem pinengdak ti bagik. Masapul a patibkerek ti bagik. Masapul a diak paluknengen ti riknak.

Dimmawatak iti bakasion iti opisinak ket naggawidak iti ilimi a Sinait. Kayatko ti umadayo tapno mailiwliwagko ti sugat ti pusok.

Maysa nga aldaw, nasangailik ni Elsie. Diak ninamnama nga umay ditoy balay.

Naammuak ken ni Manong a nagsinakayon. Kayatko a maammuan no ania ti gapuna,” kinunana.

Nasken kadi pay?” nakunak. “Basta nariknak a diak gayam ay-ayaten.”

Dinak paglibakan, Mercy,” kinuna ni Elsie. “Nabayagtan a nagdendenna. I know you from head to foot. Ammok nga adda dakkel a gapuna no apay a nakisinaka ken ni Manong.#

(Maigibusto)