INDAYON NI LAGIP: Ti Ik-ikutak a Palimed (Maikatlo a paset)

Nadatngannakami ni Elsie a naragsak ti panagpatpatangmi ken ni Andy bayat ti panagmeriendami.

Kalpasan ti panangited ni Andy iti abasto ni Elsie, nagpakadan.

β€œAdda asikasuek ditoy siudad inton umay a lawas. Mabalin ti umay agpasiar?” sinaludsod ni Andy kaniak.

β€œSilulukat toy kaserami kenka,” insungbatko.

Diak naaluadan ti nagdayyeng bayat nga indalimanekko dagiti nangananmi. Sinurotnak ni Elsie iti kusina.

β€œOy, naragsaktayo ita, a,” kinunana. β€œMakitak ket nadaraskayo a nagsinninged ken ni Manong.”

β€œNaragsak a kasarsarita ni Manongmo. Apay a dimo nasarsarita nga adda kabsatmo a lalaki?”

β€œIdi pay la koma nga iyam-ammok ngem amkek a no agdaton kenka, maipada laeng kadagiti pinaaymo. Naminsanen a nagayat ken napukawan iti kaayan-ayat ket nakitak no kasano ti panagsagabana. Diak kayat a maulit manen nga agsagaba,” kinuna ni Elsie.

Adda kano kaayan-ayat ni Andy a kalugaranda. Ni Myrna, maysa a nars. Natinong ti kasarda. Maysa nga aldaw, napanda naggatang kadagiti masapsapulda iti kasarda. Ngem naaksidente ti naglugananda. Natay ni Myrna. Agingga ita, di pay nalipatan ni Andy.

β€œNaliday gayam ti biag ni Andy,” nakunak. β€œNgem saan a maymaysa ti babai. Makasarakto iti sabali nga ipatpategna.”

β€œNo agayat kenka ni Manong, ikarim a dimo paldaangen,” iniggaman ni Elsie dagiti dakulapko.

β€œKasano ti pannakaammom nga agayat kaniak ni Manongmo?” nagkatawaak.

β€œTatta la a mangegko manen ti nasarangsang a katawa ni Manong. Maysaak a babai, ammok a matnagto ti riknana kenka.”

Agpayso, masansanen a sumarungkar ni Andy iti kaserami. Adda latta regalona kaniak. Masansan nga awisennakami a mangan iti ruar wenno mapan agpasiar iti mall. Dandani inoras a tumawag kaniak iti selpon.

Annugotek a nagbalin a namaris dagiti aldawko. Uray iti rabii, adda dagiti gundaway a malukagak a naganna ti ibalbalikasko.

Idi impudno ni Andy ti ayatna kaniak, panagriknak, naitayokak iti law-ang. Idi petpetanna ti dakulapko sanak pinerreng, nagdumogak ta diak masarkedan dagiti agum-umbi a matana. Ket idi awidennak, awanen ti pigsak nga agkitakit. Idi agkannak, nariknak dagiti babassit a koriente a nagramaram iti sibubukel a bagik agingga iti nagtunglabak iti maminribu nga ipapatay!

Manong Danny, kastoy gayam ti agayat!

(Adda tuloyna)