INDAYON NI LAGIP: Ti Ik-ikutak a Palimed (Maudi a paset)

Diak a simmungbat. Namrayak ti nagdumog.

Patpatgek ni Manong. Napategka metten kaniak. Ammok nga agpimpinnategkayo a dua. Please, ibagam ti gapuna a nakisinaka ken ni Manong.”

Diakon nalapdan dagiti lua a nagarubos iti matak. Immarakupak ken ni Elsie. Naganug-ogak.

Nariknak ti ima ni Elsie a nangpikpik iti bukotko. Binay-annak a nagsangit iti abagana.

Ibagam koma ti problemam, Mercy,” nakunana. “Sidadaanak a tumulong tapno agsinnublikayo ken ni Manong.”

D-diak maikkan ni Andy iti anak…” nagtigerger ti timekko.

Ket nauyos ti palimed nga ik-ikutak iti nabayag a panawen.

Ubingak pay idi, agtawenak iti lima. Maysa nga aldaw a panagay-ayammi iti sinnibongan, napilik ti aglemmeng iti tuktok ti purked a mangga iti likudan ti balaymi.

Ngem iti yuulik, naspak ti sanga a nagkalantayak ket nakaruskosak a nagpababa. Naitupa ti pus-ongko iti maysa a bato. Intaraydak dagiti dadakkelko iti ospital.

Kinuna ti doktor a gapu iti pannakaitupa ti pus-ongko iti bato, saanakton a pulos a makaanak.

Naiparipirip ni Andy ti ayatna a maaddaan iti annak, ngem diak maited dayta nga arapaapna…” naburak ti timekko. “Dayta ti gapuna nga ita ta nasapa pay, aginnadayokamin. Diak kayat a marakrak ti pagtaenganmi gapu ta saanko a maikkan iti annak….”

Nabayag a nagari ti ulimek iti nagbaetanmi.

Agrubbuatkan ta agsublita,” kinuna ni Elsie. “Saan a marisut ti problemayo ken ni Manong no tarayam ken liklikam.”

Awan ti makitak a pakarisutan daytoy a problemak,” nakunak. “Saanakto a kumpleto nga ina ta diak met maited ti arapaap ni Andy nga annak…”

Kasaritam ni Manong. Masapul a maammuanna daytoy,” kinuna ni Elsie.

Maawat ngata ni Andy?”

Patpatgennaka ni Manong. Ammok a saan a ti saanmo a pannakaited iti annak kenkuana ti agbalin a tubeng iti naragsak a panagdennayo.”

Iti dayta a malem, nagsublikami iti Candon, Manong Danny. Addan nga agur-uray ni Andy iti Candon Arcade idi makadanonkami. Tinawagan ni Elsie a sabatennakami.

Iti kaserami, binay-annakami ni Elsie a nagwayas. Impudnok ti amin ken ni Andy.

Saanko a maako a dika maikkan iti annak, Andy. Sumapulka laengen iti sabali…”

Nabayag a di nakatimek ni Andy. Madamdama, kinunana: “Apay a dimo imbaga kaniak idi pay? Ay-ayatenka ket saanto a kumpleto ti biagko no awanka. Mabalinta met a bangonen ti pagtaenganta uray dinak maikkan iti anak. Ti importante, umokto ti ayat ti pagtaenganta…”

Idi arakupennak ni Andy, nasiputak ti nakangato a tangan ni Elsie. Sinallukobannak metten iti nagpaiduma a ragsak ta pinagbalinko gayam nga al-alia ti palimedko a dandani nangrakrak iti bangonenmi a pagtaengan ken ni Andy.

Daytoy ti estoriak, Manong Danny, ket sapay koma ta adda naipaayna nga adal kadagiti agdengdengngeg kenka.#