INDAYON NI LAGIP: Ti Lalaki iti Biagko (Maudi a paset)

Tunggal sumarungkar ni James, adda latta sagutna ken ni Daisy. No saan a sabong, tsokolate wenno masaramsam.

“Ayna, lumukmegak la ketdi kadagitoy a sagutmo kaniak,” nakuna ni Daisy ken ni James iti naminsan a pannanganmi iti bibingka nga inkuyog ti pagayamko.

“Ay, saan kadi, insan, ta dikanto ket agbalin a kasla ken ni Dabiana,” nakunak.

Nagkatawa ketdi ni Daisy a nangparimrim ken ni James.

Inyawis ni James ti panagpasiarmi iti karayan. Napintas ngamin ditoy a pagpallailangan. Malaksid a nadalus ti angin a lang-aben, makaguyugoy ti agdigos ditoy

“Pakarsak ngarud ti rama ni Papang,” nakunak. “Mangaldawtayo iti karayan.”

“Nagsayaaten,” nakuna ni Daisy. “Nabayagen a diak nakasida iti sadiwa a lames.”

Bayat ti panagkaras dagiti katulong ni Papang, nagdigos da Daisy ken James iti nasursurong a paset ti karayan. Nakasarsarangsang ti katawada bayat ti panagsisinnayoda iti danum.

Nakasiurts ni kasinsin ken nakatisirt iti asul a nagdigos. Iti pannakabasa ti lupotna, ad-adda a nagminar ti makaalino a pammagina. Siguraduek nga ad-adda manen ti pannakakayaw ni James iti kasinsinko.

Naamilko ti bibigko. Maragsakannak ta agluniten ti sugat iti puso ni James. Umdasen a pakaragsakak a naragsak ti pagayamko. Ngem ragsak nga adda karagpinna a liday…

Iti pangngaldaw, nagmayat ti pannanganmi ta naipasabat ti bisinmi. Ngem dakkel a pakaray-awak ti nakitak a kinaragsak ni James iti denna ni Daisy.

Maysa nga aldaw, inasitgannak ni James.

“Saannak ngata a kagura ni Daisy no agpudnoak kenkuana?” sinaludsodna kaniak.

“Apay ketdin a gumura?” nakunak.

“Diak kayat a pagarupenna a gungundawayak ti kinaasidegna kaniak.”

“Nasaysayaat nga amang ti mapaay nga imbagam ti ayatmo ngem ti mapaay a dimo nailatak ti riknam,” nakunak.

“Dinak met la kagura, best friend, no agdatonak iti kasinsinmo?”

“Apay ketdin a kaguraka? Ad-adda ketdi a gumuraak no saanmo nga ilatak kenkuana ti panagayatmo. Best friend, ur-urayen laeng ni kasinsin ti panagpudnom.”

“Kasta? Kasano nga ammom?”

“Kabisadok diay kasinsinko manipud kinaubingmi. Ammok ken mariknak a natinnag metten ti riknana kenka.”

Iti dayta a malem, nagpudno ni James ken ni Daisy. Saan metten a nagpakipot pay ti kasinsinko ta nabayagen nga ur-urayenna ti panagpudno ni James.

Natinong ti kallaysada. Siak ti napilida a best man. Nasinged a gayyem ni Daisy ti best woman. Napintas. Edukada.

“Kasinsin, dimon palusposan dayta!” inkissiim ni Daisy idi iyam-ammona kaniak.

Ngem ti dida ammo, agpaspasaanang ti pusok, Manong Danny. Nagmanto ti langit kaniak. Kaarigna a kanibusananen ti lubong kaniak. Wen, diak malapdan ti riknak a di lumdaang. Ta dandanin mapukawko iti agnanayon ti pagayamko, ti ragsakko, ti inspirasionko iti biag, ti lalaki iti biagko… ni James.

Kastan, Manong Danny. Naimbag a rabiim.

Toy pagayammo

Mark Javier