INDAYON NI LAGIP: Ti Lalaki iti Biagko (Tuloyna)

“Innalilawnak ni Windy, bespren,” nagbanarbar ti timek ni James. “Pinagay-ayamanna laeng ti ayatko.  Inaklonnak laeng gayam ta kayatna a lipaten ni Bert, ti sigud a kaayan-ayatna.  Ita ta nagsubli ni Bert ket agkidkiddaw iti sabali pay a gundaway tapno sulnitanna dagiti nagkuranganna,  inawatna daytoy.  Dinawatna kaniak a lipatekon ti kasarmi ta ni pay laeng Bert ti patpatgenna.   Nasakit, gayyem, ti inaramid ni Windy,” kinuna ni James.

Inawidko ni James ket binay-ak a nagsangit iti abagak.

“Saan a maymaysa ti Windy. Makasarakkanto iti sabali. Malipatamto ni Windy,” nakunak idinto a pinikpikko ti likudanna.

“Mabalin nga aggianak pay ditoy balayyo?”

“Wen, nakalukat ti balaymi kenka,” naragsakannak iti dayta a kinuna ni James.

Immanamong met dagiti dadakkelko iti panaggian pay laeng ni James ditoy balay. Ammoda no kasano ti kadekketmi iti tunggal maysa.

Dimmawatak iti opisinami iti makalawas a bakasion. Kinadkaduak ni James. Idi damo, masansan a maikulkuleng. Liniwliwak babaen ti panangikuyogko kenkuana iti orchardmi. Ditoy ti naggiananmi iti tallo nga aldaw. Saanmi a problema ti taraonmi ta adda abastomi. Nadalus ti angin ditoy.

Iti bigat, agpagnapagnakami ken ni James agingga a makadanonkami iti dan-aw a pagdigosanmi.

Kaslakam ubbing nga agsinnayo ken agkinnamat nga aglangoy. No mabannogkamin, agiladkami lattan iti kabatuan sami tangaden ti tangatang.

Idi damo, naem-em ti bibig ni James. Ngem iti maikatlo nga aldaw, umisem met laengen kadagiti angaw ken sutilko.

Ngem iti rabii, no nargaanen ti turog ni James, agballikidak a sumango kenkuana sako matmatan. Nakaguapguapo ti panagkitak kenkuana iti panangdayas ti sellag iti rupana.

Diak maaluadan ti bagik a di mangapros iti pingpingna. No dadduma, mapuotak lattan ti bagik a nakaarakup kenkuana.

“Natiwengka gayam a maturog,” umis-isem a nakuna ni James idinto a timmakder sa naginat iti sanguanak.

Napatilmonak idi makita ti mala-adonis a pammagina a binegkes ti awan manggasna a tisirt. Nakashorts laeng ket iti yaangesna iti nauneg, kasla diosen a bimmaba ditoy daga ti panagkitak kenkuana.

“Apay a kasta ti panagkitam kaniak?” sinaludsodna nga umis-isem. “Adda kadi mukatko?”

“A-awan,” naisungbatko. “Mauyong ti babai a mangtallikud iti panagayat ti maysa a lalaki a kas kenka.”

“Saanmon a dakamaten ni Windy,” kimmudrep ti matana. “Ibilangko laengen a maysa a dakes a tagainep.”

“Dayta ti kayatko nga aramidem,” nakunak. “Adda sabali nga ayat nga agur-uray kenka.”

Nagsublikami iti balaymi kalpasan ti lima nga aldaw. Naganaygayen ni James.

Adayokami pay idi masaripatpatanmi ti nakashorts a babai nga agsagsagad iti paraangan ti balay. Nailasinko: ni Daisy, ti kasinsinko.

Idi taliawek ni James, saan a nailinged kaniak ti pannakakayaw a naimaldit kadagiti matana.

Diak ammo, Manong Danny, ngem kellaat a naglumen ti namaris nga aldawko. Ammok ken nariknak a nasarakanen ni James ti babai a mamagpitik manen iti pusona!

(Maituloyto)