Indiscriminate firing, napasamak iti Sinait

SINAIT, Ilocos Sur – Iti baet ti kampania ti kapolisan a di panagpaputok iti paltog iti panangselebrar iti baro a tawen, naireport iti police station ditoy nga adda indiscriminate firing a napasamak iti Barangay Calingayan ditoy nga ili idi agarup12:00 ti tengnga ti rabii ti Disiembre 31.

Dagus a nagresponde dagiti polis ket nagturongda iti nadakamat a barangay. Nadanonda met ditoyen dagiti kameng ti RPSB 1st Company a madama nga agpalpalutpot mainaig iti mapapati a panagpaputok.

Iti inisial a panagimbestiga dagiti polis-Sinait, naammuan a bayat ti panagsubli dagiti soldado iti kampoda a masarakan iti Barangay Turod, nakitada ti maysa a big bike motorcycle nga awanan plaka a naabandona iti rangtay ti barangay.

Iti panagsukimat dagiti soldado, nakasarakda iti walo a kapsula ken maysa a bala manipud iti kalibre 45 ken pito a kapsula manipud cal. 5.56 iti lugar a mapapati a nagpaputokan dagiti di pay nabigbig a tattao.

Naipan iti police station ti motorsiklo para iti kanayonan a panagimbestiga.#