Footer

Industria ti lana, maysan a cartel

NGIMMATO manen ti pump price ti gasolina iti P40+, diesel iti P38.53, kasta met ti kerosene idinto a P1.20 kada kilo ti ngimmatuan ti liquified petroleum gas (LPG).

Iti daytoy a tawen, daytoy ti maika-16 a daras a pannakaipangato ti presio ti gasolina ket agdagupen iti P9 kada litro, maika-13 iti diesel nga agdagup iti P6.50 kada litro ken iti kerosene nga agdagup iti P7 kada litro. Nupay naipangato met iti namin-13 ti presio ti LPG nga agdagup iti P10.08 kada kilo, naipababa met iti naminpito nga agdagup iti P3.36.

Mismo pay nga inannugot ni Energy Secretary Angelo Reyes a saan a resonable ti pannakaingato ti presio ti gasolina, diesel ken kerosene ken LPG.

Kas kuna ni Reyes, nanginngina koma ti gasolina ken diesel iti aganay P7 agingga iti P8 kada litro no P55 ti pakaisukatan ti pisos iti doliar. Ngem iti agdama, magmagna iti P43.50 ti sukat ti pisos iti doliar. Adda pay tendensiana a pumigsa latta ti pisos gapu kadagiti remittances dagiti overseas workers iti isasangbay manen ti Paskua.

Iti nalawlawag a pannao, awan ti rason a maingato ti presio ti produkto a petroleo.

Pinatulodan ti DOE dagiti kompania ti lana iti surat no ania ti rationale iti pannakaingato ti presio ti produkto a petroleo.

Tapno maalay-ayan ti epekto ti panagpangato ti presio dagiti produkto a petroleo,  nainget nga iyimplementar ti DOE ti Biofuels Law. Sagudayen daytoy a linteg a laokan dagiti agar-aramat iti gasolina ken dagiti kompania ti lana dagiti lakoda iti biodiesel wenno bioethanol.

Iti met biang ti Malakaniang, silulukat iti posible a pannakaited iti subsidy kadagiti sumagmamano a produkto ti lana.

Ngem saan nga umdas dagitoy a mangep-ep iti epekto ti pannakaipangato ti presio dagiti produkto a petroleo kadagiti umili. Kasapulan a mangiwayat ti gobierno iti  nasolsolido a wagas a panangrisut iti mapaliiw a kaawan gawayna a mangtimon kadagiti oil companies a mangipangato lattan iti presio ti gasolina, diesel, kerosene ken LPG.

Maysa a sirigen ti turay ti pannaka-repeal ti Oil Deregulation Law.

Kangrunaan a panggep ti nasao a linteg ti nalaklaka a presio dagiti produkto a petroleo agsipud iti manamnama nga iseserrek dagiti dadduma pay a kompania a mangited iti kompetision kadagiti dadakkel a kompania ti lana a nakapasdek iti pagilian.

Ngem sungani ketdi ti napasamak. Ita, maysan a cartel ti industria ti lana iti pagilian agsipud ta maidiktar dagiti kompania ti lana ti presio dagiti produkto a petroleo ket sumursurot lattan dagiti babassit a kompania.

Agtignay koman ti gobierno para iti pannakawaswas iti daytoy a linteg. Ditoy ti pangipakitaanna nga addaan iti politikal a determinasion a mangwara iti daytoy a cartel para iti nailian nga interes, nangruna dagiti marigrigat nga umili a kangrunaan nga apektaran iti panagpangato dagiti presio dagitoy a produkto.#