Insentibo a kuarta, naited iti gobierno probinsial ti Ilocos Sur

VIGAN CITY – Agdagup iti P179,100.00 ti insentibo nga impaay ti Philippine Coconut Authority (PCA) iti gobierno probinsial ti Ilocos Sur, daytoy ti naammuan manipud iti opisina ni Governor Ryan Singson itay nabiit.

Mismo a ni Engineer Bobbie Simon, pannakabagi ti PCA, ti nangiyawat iti cash incentive ken ni Singson iti maysa a seremonia a naangay iti provincial capitol idi Abril 12, 2016.

Kinuna ni Simon a naited ti cash incentive kas gunggona ti gobierno probinsial iti naballigi a panangiyimplementarna kadagiti proyekto ti produksion ti nyog iti probinsia.

Innayon ni Simon a nakapataud ti gobierno probinsial iti nasurok walo ribu a bunubon ti nyog nga agtayag iti dua a kadapan a nagatadan iti P18.00 kada bunubon.

Kabayatanna, kinuna ni Singson a dakkel ti suportana iti nasao a proyekto  idinto nga indagadagna kadagiti coastal barangays ti panagmulada iti ad-adu pay a pinuon ti nyog.

“Mangipaay pay iti panggedan kadagiti umili ken makapatanortayo kadagiti sabsabali a lokal a produkto manipud iti nyog,” innayon ni Singson.

Kinuna ni Simon a ti panangipapaayda iti cash incentive ket maysa a wagas tapno maallukoy ti komunidad nga agpadakkel iti nyog tapno masalakniban ti aglawlaw.

“Ti nyog ti makunkuna a kayo ti biag agsipud ta tunggal paset ti kayo manipud iti ramut agingga iti bungana ket addaanda iti adu a pakausaran. Isu ti pagtaudan iti virgin coconut oil, ti paggapuan dagiti nadumaduma a produkto ti taraon ken nadumaduma a handy craft products,” kinuna ni Simon.

Naammuan a maiwaras dagiti bunubon a nyog nga agtayag iti dua kadapan iti coastal barangays ti probinsia tapno marehabilitar ti kabakiran ti igid ti baybay ti probinsia. Mamonitor dagiti maimula a nyog kalpasan ti tallo agingga iti uppat a bulan ket maikkan dagiti barangay iti cash incentive a P20.00 kada napadakkel a pinuon ti nyog. (Manipud iti report ti PIO, Ilocos Sur)