Footer

Insidente ti panagtakaw, napasamak iti dua nga otel

NARVACAN, Ilocos Sur – Nakaawat ti Narvacan PS iti report idi agarup 6:40 iti agsapa ti Hunio 6 daytoy a tawen nga adda sangaili nga agasawa a natakawan iti maysa a resort hotel ditoy nga ili.

Timmawag ni dati nga SB member Chito Valera iti Narvacan PS iti agarup alas 6:40 ti agsapa idi Hunio 6 ket inreportna a natakawan dagiti agasawa a Ruel Cruz y Santos, 42, Pastor of Door of Faith Church ken ti asawana a ni Carol Joy Cruz y Gange, 34, agpada a residente ti Brgy. Longos, Calumpit, Bulacan a kaduada ti dua nga annakda, iti Room 5 iti Gloria Beach Resort iti Brgy. Bulanos, Narvacan, Ilocos Sur a nagtsek-inanda.

Iti inisial nga inbestigasion, naammuan a nagtsek-in ti pamilia Cruz iti agarup 12:00 ti tengnga ti rabii ti Hunio 5. Nakaturogda iti agarup 1:00 ti parbangon ti Hunio 6. Idi makariingda iti agarup 5:30 ti bigat ti Hunio 6, nasukalanda nga awan ti maysa a selponda ken nakitada nga adda metten iti ruar dagiti bagda. Iti panagsukimat dagiti nagresponde a polis, naammuan a natakaw dagiti sumaganad: Samsung J7 Prime Cellphone nga agbalor iti P13,000.00; dua a singsing a balitok nga agbalor iti P5,000.00; pitaka a nakaikabilan ti driver’s license, Voter’s ID, SSS ID, Humid ID, Pastor’s license ken P25,000.00 a kas.

Awan nakita dagiti inbestigador a pagilasinan ti forcible entry. Simrek dagiti di pay ammo a mannanakaw iti akinlikud a ruangan ket ditoy met laeng ti rimmuaranda. Kuna dagiti biktima nga impagarupda nga in-lock ni Jaylord Soria, empliado ti resort, ti ridaw idi rimmuar daytoy kalpasan ti iseserrekna a napan nangi-on iti air conditioning unit iti kuarto dagiti biktima.

Kuna dagiti biktima a gapu iti bannogda iti adayo a biahe manipud Bulacan inggana’t Narvacan, narnekanda a naturog ket dida pulos nadlaw a nakurimes dagiti napateg a gamitda.

Naalaan amin dagiti empleado ken staff ti Gloria Beach Resort ti finger prints babaen dagiti SOCO team a naggapu iti Candon City nga indauluan ni PCI Leonardo Arce, para iti Finger Print Identification.

ITI sabali pay a damag, natakawan met dagiti sangsangaili a nagtsek-in iti maysa nga otel iti Brgy, Paras, Candon City, Ilocos Sur idi agarup 6:00 ti Hunio 8 daytoy a tawen, a nakatakawan dagiti nadumaduma ti laptop ken cellphone.

Nakaawat ti Candon City PS iti report idi agarup 12:40 ti malem ti Hunio 8 daytoy a tawen a natakawan dagiti sangsangaili a nagtsek-in iti Aloha Nui Hotel iti Brgy. Paras, Candon City, iti agarup 6:00 ti bigat.
Nainaganan dagiti biktima a da Marlon Tejeros Din, 35, addaan asawa, Aloha Security Agency Branch Manager, residente ti 954 Caruncho Comp., N. Cruz St., Palatiw, Pasig City; Jocelson Caspe, Benico IV, 31, naasawaan, Expansion Officer ti RD Pawnshop Inc., residente ti Brgy. Dungon C. Iloilo City. and Michael Vincent Zaldivar, 32, naasawaan, Asst. group Head Luzon-RD Pawnshop Inc., residente ti Manggubat St., Pasay City.

Iti inisial nga inbestigasion, nagtsek-in dagiti biktima iti Aloha Nui Hotel iti Brgy. Paras, Candon City iti agarup 8:00 iti rabii ti Hunio 7 daytoy a tawen ket naited kaniada ti Rm. No. 108. Idi agarup 6:00 ti bigat ti Hunio 8, nakariing ni Benico ket nasdaaw ta awan metten ti Samsung Tablet ken Asus a selponna a nakakabil iti uneg ti brown sling bag nga indissona iti tugaw iti abay ti katrena. Riniingna dagiti kaduana ket imbagana ti naduktalanna. Nasukalan met dagiti kaduana nga awan metten dagiti gamitda, kalpasan a sinukimatda dagiti bagda.

Dagitoy dagiti napukaw a gamit: 1 Laptop Acer Aspire, Php27,999.00; 1 Samsung j7 plus, Php20,000.00; 1 Samsung J7 prime – Php11,900.00; 1 car key a kukua ni Marlon Din; 1 Samsung tab 3, Php13,793.00; 1 Asus selpon, Php9,000.00; 1 paris Adidas a sapatos, Php3,000.00 a kukua ni Jocelson Benico IV and 1 Redmi 4x, Php5,000.00; 11 Skeimei watch, Php700.00 and 1 Acer laptop, Php30,000.00 a kukua ni Michael Zaldivar. Php121,392.00 amin ti balor dagiti natakaw.

Awan ti pagilasinan ti forced entry ket patien dagiti inbestigador a simrek dagiti mannanakaw iti sliding window a masarakan iti akinlaud a parte ti kuarto dagiti biktima. Saan a sigurado dagiti biktima no naka-lock wenno saan ti nasao a tawa idi maturogda.

Nasarakan iti amianan a paset ti otel ti olive drab sling bag ni Marlon Din.

Dinawat ti Candon CPS ti SOCO team a mangprocess iti nakapasamakan ti krimen. (Tawid News Team)