Inspeksion dagiti pagkiluan, agtultuloy a maipakat

MAGSINGAL, Ilocos Sur – Maiwaywayat latta ti inspeksion dagiti pagkiluan iti tiendaan publiko ditoy tapno masaluadan ti buying public, daytoy ti impasingked ti market inspector itay nabiit.

Segun ken ni Market Inspector Jojo Villalobos, ipakpakatda latta ti panaginspeksion kadagiti pagkiluan iti tiendaan publiko nangruna iti fish ken meat section tapno masigurado a husto ti kilo dagiti tagilako a gatangen dagiti consumers.

Kinuna ni Villalobos nga addan dagiti nasukalanda a depektibo a pagkiluan ket dagitoy ti kinumpiskada sada impan iti treasurer’s office.
Innayon ti market inspector a napagmulta dagiti tindera a nasukalan a nangkulikot kadagiti pagkiluanda a pakasuitikan dagiti aggatgatang.

Tunggal Sabado ken Mierkoles ti tienda ditoy nga ili.#