Inspeksion maiserrek a karne iti tiendaan ti Vigan, napaingetan

VIGAN CITY – Napaingetan ti pannakasiput dagiti maiserrek a karne iti tiendaan publiko ditoy iti sanguanan ti pannakaduktal nga adda dagiti naipuslit a frozen meat products itay nabiit.

Kinuna ni Market Master Bonifacio Corpuz nga imbilinnan kadagiti adda iti babaenna ti panangipakatda iti naing-inget nga inspeksion kadagiti maiserrek a mailako a karne ken meat products iti tiendaan publiko ditoy idinto nga impasingkedna a saanton a maulit ti pannakaipuslit dagiti karne ken meat products a mailako iti uneg ti tiendaan ti Vigan.

Naammuan ti Tawid News a nakabakasion ni Corpuz gapu iti pannakaoperarna idi adda nasukalan a naipuslit a frozen meat products iti tiendaan publiko ditoy siudad.

Kinuna pay ni Corpuz nga impaganetgetna kadagiti kakaduana nga ipakaammoda kenkuana aniaman a makitada a saan a mabalin a karne a maipuslit iti tiendaan tapno dagus a mapakaammuan ti city veterinarian ket kitaenna no husto met la ti papelesda.

Itay nabiit, indauluan ni Mayor Eva Marie S. Medina ken ti agriculture office iti panangidaulo ni City Veterinarian Liborio Arca  a nangisayangkat iti operasion iti tiendaan publiko ket kinumpiskada dagiti frozen a karne ken laplapayag a mailaklako iti tiendaan kalpasan nga awan ti naipakita dagiti negosiante a dokumento a pammalubos kadakuada a mangiserrek kadagitoy a tagilako iti tiendaan publiko.

Kinuna ni Medina nga adda napartuat nga ordinansa ti siudad a masapul a maparti amin iti slaughterhouse dagiti mailako a karne ti baboy iti tiendaan idinto a linagidawna no kasano a naipuslit dagiti na-chop-chop a karne iti Ilocos Sur idinto nga adda met quarantine checkpoint iti Tagudin.

Kinuna ni Medina a masapul a bihilanteda nga agtuturay agsipud ta adu a tattao ti nakasanggir iti industria ti longganisa ken bagnet ket no madadael daytoy, adu ti mapukawan iti pagsapulan, adu nga annak ti saan a makapagbasa ken saan a nasayaat ti panagbiagda.

Imballaag pay ni Medina kadagiti empleado iti tiendaan a panagliway iti pagannonganda iti pannakaipuslit dagiti karne ken meat products iti tiendaan a saan a naglasat iti inspeksion iti pagpartian.

Inggunamgunamna kadagiti umili a no adda makitada a madi nga aramid, “dapat laeng nga ipakaammoda kadagiti otoridad tapno maibideran daytoy a banag tapno masaluadan, saan laeng dagiti residente ditoy siudad no di pay dagiti turista”.

Kabayatanna, kinuna ni Corpuz nga adda maituding a taona nga agtsek kadagiti karnean iti uneg ti tiendaan, malaksid laeng ti sabali pay nga agtsek iti pagpartian tapno masigurado a  safe dagiti karne a maiserrek a mailako iti tiendaan.#