Instolasion ti proyekto ti danum, nagkaproblema

MAGSINGAL, Ilocos Sur – Nagkaproblema iti pondo ti pannakaipasdek ti proyekto a water works ditoy nga ili isu a naisardeng ti pannakaitrabahona itay maudi a bulan ti 2013.

Segun ken ni Municipal Planning and Development Coordinator Engr. Tiburcio Tabarrejo, temporario a naisardeng ti pannakainstolar ti linia ti danum kadagiti poblacion barangays gapu ta awan metten ti maawatda a kanayonan a pondo manipud iti Local Water Works Administration.

Adda naruk-atan nga inisial a P3 milion manipud iti P11 million a kadagupan a pondo para iti daytoy a proyekto a kiniddaw ni Mayor (idi) Arlyn Favis ken ni dati a LWWA administrator Prospero Pichay ket daytoy ti naigatang kadagiti tubo a namagkamang kadagiti nasao a poblacion barangays.

Iti ubbog sadiay Barangay Bacar ti inisial a pagtaudan koma ti danum ngem gapu ta salty, naiyalis ti source ti danum iti Barangay Barbarit.#