Footer

Interlinks nga alad, naputedputed a maiporkilo

VIGAN CITY – Karigat ti panagbiag ket uray interlinks ken barb wire ti alad ti dati a gobernador ket saanen a pakawanen dagiti mannibrong.

Tallo a lallaki ti nasukalan nga agputputed iti interlinks ken barb wire a pannakaalad ti Baluarte a pagtaengan ni dati a Gov. Luis “Chavit” Singson itay nabiit.

Iti pannakapalutpotda iti polis station ditoy, inannugot da Ralph Vincent Pilosopo, 22; Ronald Aquino, 28; ken Rosario Tolentino, 23, agpapada amin nga agnaed iti Barangay Bulala ditoy nga isuda ti nagputed iti interlinks ken barb wire nga alad ti Baluarte.

Segun iti inbestigasion, nasalamaan dagiti agkabsat a Warlito ken Rey Arreola, residente iti Barangay Salindeg, dagiti tallo a suspetsa                                                                                                                                                                                                                       nga agputputed iti interlinks ken barb wire babaen ti cutter iti agarup 9:30 iti bigat ti Lunes.

Nakadanon dagiti agkabsat iti dayta a lugar iti panagsapulda iti uong.

Impulong dagiti dua ti nakitada iti kapitan ti barangay ti Salindeg ket indanon daytoy ken ni ABC President Constante Benzon. Indanon met ni Benzon ti impormasion iti general manager ti Baluarte.

Dagus a nagturong dagitoy iti lugar a nakakitaan kadagiti suspetsa ngem awandan ket imbatida lattan ti sinako a naputed nga interlinks ken barb wire.

Naapput dagiti suspetsa iti dalanda nga aggawid.

Mapapati a mapan ilako dagiti suspetsa dagiti pinutedda iti maysa a junk shop ditoy met laeng siudad.#