Editorial: Internal cleansing iti PNP | Tawid News Magazine - Weekly Ilocos News đź“°

Internal cleansing iti PNP

KASANO a madalusan ti Philippine National Police kadagiti rinuker a kameng no dagiti mismo a mangidaulo ket saan a serioso iti panagserbida?

Nagsasangan ti turong ti imbestigasion ti Senado maipapan iti Good Conduct Time Allowance ta saan laengen a maipapan iti Bureau of Corrections, ngem nairamanen dagiti “ninja cops” a mangdaddadael iti imahe ti PNP.

Makakellaat dagiti maiparparuar iti imbestigasion ti Senate Blue Ribbon Committee ken Committee on Justice nga idauluan ni Senador Richard Gordon ti kaadda dagiti police scalawags wenno ninja cops a promotor iti drug recycling dagiti matiltiliw nga illegal a droga.

Timpuar dagiti kontrobersia iti panagimbestigar iti Senado iti panagtestimonia ni Baguio City Mayor Benjamin Magalong, retirado a police major general, ken nagserbi a Director ti PNP Criminal Investigation and Detection Group ken Chief ti Directororate for Investigation and Detective Management. Idi panawenna a nagiwayat ti CIDG iti imbestigasion ken nakikaysa kadagiti operasion ti illegal a droga sadiay New Bilibid Prisons.

Idi napagsaludsodan ni Magalong, maipapan kadagiti ammona idi isuna ti mangidaulo ti CIDG, nadakamatna ti kaadda dagiti “ninja cops” a mainaig iti operasion ti “agaw-bato, drug recycling, ken palit-suspek. Idi nadamag no adda ken sino pay dagiti sigud nga inimbestigaran ti CIDG idi isuna ti Director, nagkiddaw iti “executive session” wenno closed-door session a nangibutaktakanna kadagiti polis nga inimbestigaranda mainaig iti droga, agraman dagiti opisial a nangkonsintir wenno nagliway a nangdisiplina kadagiti patienna a ninja cops.

Sinalaysay ni Magalong ti inembistigaranda a maipapan iti anti-illegal drug operations nga insayangkat dagiti 13 nga operatiba ti Pampanga Police Provincial Office Anti-Illegal Drugs Special Operation Task Force iti pagtaengan ti Chinese big-time drug trafficker a ni Johnson Lee sadiay Woodbridge Subdivision, Lakeshore View, Mexico, Pampanga idi Nobiembre 29, 2013. Dayta nga operasion ket indauluan ni Police Supt. Rodney Baloyo ket ti Pampanga Provincial Director idi ket ni Sr. Supt. Oscar Albayalde nga itan ket General ken PNP Chief. Inrakurakna nga inimbestigaranda ti pasamak gapu iti bilin ni Director General Alan Purisima ta adda report a kalpasan ti anti-drug operations ket naggigiddan a nakagatang iti SUV dagiti polis a karaman iti operasion. Iti panagimbestigarda, natakuatanda a saan laeng a 38 a kilo a shabu ti nakompiskar dagiti polis, ngem mapattapatta a nasurok-kumurang a 200 a kilo a ti gatadna iti dayta a tiempo ket dumanon iti P648 Million. Naduktalanda pay nga adda nasamsam dagiti polis nga agarup P10 Million cash. Imbutaktakna pay a pinalibas dagiti polis ni Johnson Lee a nagpasuksok iti P50 Million, ket napanda nangtiliw iti sabali a suspek sadiay Clark Economic Zone nga impresentarda.

Inrakurak pay ni Magalong a nakimitir ni Albayalde iti pannakaipakat ti dusa iti administrative case kadagiti 13 a polis iti Pampanga idi isunan ti Director ti National Capital Region Police Office idi 2017 ta inawaganna iti telepono ni Region 3 Police Director Aaron Aquino (Director General itan ti Philippine Drug Enforcement Agency) iti telepono ket kiniddawna ti saan a pannakaimplementar ti dismissal order dagiti polis ta taona ida.

Inaklon ni Aquino nga inawagan ni Albayalde iti telepono ket dinawatna a saanna nga ipakat ti dismissal order ta taona dagiti maseknan, isu a pinarepasona laeng ti kaso, ken pinaidestinona dagiti akusado a polis sadiay Mindanao.

Pinaglibakan ni Albayalde dagiti alegasion kenkuana. Inlawlawagna a tinawaganna ni Aquino tapno amuenna ti kasasaad dagiti sigud a pasurotna ta agsalsaludsod dagiti pamiliada. Binabalawna ketdi ni Magalong ta nadalusanna koma dagiti rinuker a polis idi panawenna. Impasingkedna nga ita a panawenna a naisayangkat ti nainget nga internal cleansing iti PNP. Impeksana pay ti pannakellaatna nga iruruar dagiti isyu kontra kenkuana itan ta dandanin agretiro iti serbisio.

Iti imbestigasion, natakuatan a dagiti 13 a polis a nainaig iti Mexico, Pampanga anti-illegal drugs operations ket nadusada idi 2017 iti kaso a “Grave Misconduct” babaen ti “one-rank demotion” imbes a naikkatda iti serbisio. Naamuan pay a dagiti dua nga opisial a nairaman iti kaso ket nadutokandan iti sensitibo a posision.

Imbalakad ni Gordon a nasayaat no aglusulosen ni Albayalde kas PNP Chief tapno mailisi ti institusion iti kumarkaro a kontrobersia. Ngem adda dagiti senador a mamati iti integridad ni Albayalde, ken mayuray laengen ti panagretirona inton Nobiembre 8, 2019 a mandatory retirement age dagiti polis.

No man saan a maipaneknek iti Senado ti kinapudno dagiti adu nga alegasion ken no dagiti nakompiskar a saan a naideklarar a droga ket nailakoda manen. Agdadata dagiti nagliwayan ken nagbiddutan dagiti 13 a polis iti Pampanga, ken ti pannakakonsintir iti nadagsen a nagbasolanda ta imbes a naikkatda iti serbisio ket naipababa laeng ti rankoda.

Naglatak ni Albayalde bayat ti panagtugaw a PNP Chief ni Ronald de la Rosa, ket nagakem kas NCRPO Director gapu iti kinaistriktona kadagiti pasurotna a naiparparang iti media. Simmukat ni Albayalde kas PNP Chief idi nagretiro ni De la Rosa a mishta-na iti Philippine Military Academy Sinagtala Class 1986.

Nakalkaldaang ti agtultuloy a pannakamantia ti imahe ti PNP iti laksid ti maisaysayangkat nga internal cleansing ken aglaplapusanan a suporta kadakuada ni Presidente Rodrigo Duterte, ta adda latta dagiti maibutbutaktak a nagliwayan ken nagkamtudan dagiti dadduma a polis. Saan a maliklikan ti panagdudua dagiti umili iti kaadda dagiti police scalawags ken ninja cops a makikumkumplot kadagiti drug lords kas ti saan a pannakatiliw ti maaw-awagan iti “drug queen” a ni Barangay Chairwoman Gia Gomez Castro iti Sampaloc, Manila, a nabayagen nga adu dagiti naipila a kaso kontra kenkuana, ngem saan a naaresto agingga a nakapanawen iti Pilipinas itay Setiembre 21.

No serioso ti administrasion iti pannakaparmek dagiti krimen nangruna iti illegal a droga, ken internal cleansing iti PNP, rebbengna ti padapada a pannakayimplementar dagiti pagallagadan, ken pannakaikkat iti serbisio dagiti polis a nadagsen ti basolna, saan laeng a maipababa iti rankoda. Sapay koma ta ti sumarunonto a PNP Chief ket agtignay saan laeng nga agpatingga iti propaganda, ngem napudno iti panangidaulona. (Eden Alviar)