Footer

IPAMAYSA KOMA TI DUTERTE ADMINISTRATION A PAKSIATEN TI ABU SAYYAF GROUP

Komentario ni Eden A. Alviar

(Maudi iti dua a paset)

Manipud pay idi 1991 a pannakabuangay ti ASG ket nagadun dagiti terorismo nga insayangkat ti grupo kas ti kidnap-for-ransom, panagbomba, panagpapatay, panaguram ken dadduma pay a krimen. Nagadun dagiti kinidnap ken impasakada a Pilipino ken ganggannaet. Adun dagiti pinutolanda iti ulo a hostage gapu ta saanda a nakapagbayad ti ransom.

Itay 2016 sakbay a naggibus ti termino ni Presidente Benigno Aquino III ket nakaam-ames dagiti terorismo nga insayangkat ti ASG a nangipaay ti dakes a langa ti pagilian iti international community – ti panagkidnap ken panangputolda iti ulo dagiti dua a hostage a Canadian da John Ridsdel idi Abril, ken Robert Hall idi Hunio. Agpada dagitoy a nakidnap sadiay Samal Island, Davao del Norte.

Iti awan pay makatawen a panagakem ni Duterte ket nagadun dagiti terorismo a napasamak iti Pilipinas nga insayangkat ti ASG. Kaudianna ket ti pannakaputol ni Kantner.

Idi Agosto 29 – 30 2016, kabayatan dagiti nagsasaruno a rinnupak dagiti soldado ken Abu Sayyaf ket 15 a militar dagiti napapatay ken 12 dagiti nasugatan.

Idi Septiembre 3, 2016, ket 14 dagiti natay kan pito dagiti nakaro a nasugatan iti panagbomba sadiay Davao City. Inrakurak idi ni Secretary Lorenzana nga aramid dayta a terorismo ti ASG.

Itay Pebrero 20, 2017, maysa a barko ti Vietnam, MV Giang Hai, ti inatake dagiti pirata sadiay asideg ti Baguan Island, Tawi-Tawi nga asideg iti baluarte ti ASG. Maysa ti napapatay ken pito dagiti intalaw dagiti pirata, 17 met dagiti na-rescue dagiti kameng ti Coastguard ken Marines.

Adun dagiti nagbalin a presidente ti nangikari ti panangparmekda iti ASG a nabukel pay laeng idi 1991. Tunggal administrasion ket naisayangkat dagiti all-out war kontra iti ASG. Naindaklan nga opensiba dagiti inwayat ti AFP idi panawen ni Pres. Fidel Ramos kontra ti ASG kalpasan nga insayangkat dagiti terorista ti panangraut iti Ipil, Zamboanga Sibugay idi Abril 3, 1995 a nakatayan dagiti 53 a tattao ken nakasamsaman ti billion ti gatadna a kuarta ken sanikua kadagiti banko ken establisimiento.

Nadara nga operasion dagiti militar ti nayusuat iti panawen ni Pres. Joseph Estrada iti panang-rescue-da kadagiti hostage ti ASG. Naisayangkat dagiti nandaklat nga operasion kontra iti ASG pakairamanan ti Oplan Final Option a nakawayawayaan dagiti hostage, ken pannakaparmek dagiti terorista iti kutada sadiay Camp Abdurajak, Mt. Punoh Mihajii, Isabela, Basilan.

Napinget met idi ti administrasion ni Pres. Gloria Macapagal Arroyo a nangsunson kadagiti terorista nangruna ta nakatimpuyogna ti gobierno ti Estados Unidos iti kampania kontra ti international terorism gapu iti panagkumplot ti ASG ken ti Al Qaeda a responsible iti September 11, 2001 US Terror Attack.

Napasnek met ni Pres. Aquino iti kampania ken all-out war kontra ASG, ket kalpasananna ni Pres. Duterte. Ngem apay nga agingga ita ket saan a mapaksiat ti ASG? Gapu ngata ta adda dagiti nabileg a grupo a mangsalsallukob kadakuada wenno mangipapaay iti proteksion tapno saan a magun-od ti mataginayon a kappia iti pagilian? Agpayso ngata dagiti damag a dagiti terorista ket salsaluadan a mismo dagiti agindeg kadagiti lugar a pagay-ayuyanganda, dagiti rebelde a grupo ken uray pay mismo dagiti opisial ken agpapaay iti gobierno? Agpayso ngata dagiti naipadpadamag iti naglabas nga adda dagiti opisial iti gobierno a nairanud kadagiti nagadu a ransom money?

Kabayatan ti agdama nga administrasion, maikkan koma ti prioridad ti pannakaparmek ti ASG ta ad-adu ken dakdakesen a mamin-adu nga amang dagiti naaramidda a kinadamsak ngem dagiti adu a grupo ti sindikato nga ipangpangruna a parmeken ti gobierno. Mapaksiat laeng ti ASG, no matakuatan ken maparmek met dagiti tattao a mangipapaay ti proteksion kadagiti terorista.#