Ipapan iti Tineg: Tallo nga Aldaw a “Walk with Faith”

NO agawidak iti ilimi a Danglas, masansan nga agdengngegak iti estasion ti radio sadiay ket adda dagiti mangegak a serbisio publiko wenno panawagan: “Sika, Isko Suen dita Agsimaw, Tineg, sumabatka ket mangitugotka iti dua a kabalio ta nadagsen ti kargak nga aggapu iti Bangued.” Kastoy ti naynay a mangeg a panawagan dagiti taga-Tineg no aggapuda iti Bangued.

Ti Tineg ti makuna a kabaknangan iti mineral resources iti intero nga Abra malaksid a kadakkelan ti maaw-awat iti Internal Revenue Allotment (IRA).

Agarup P4 milion ti awatenna nga IRA iti kada bulan, wenno aguppat a pulo ket walo a milion iti kada tawen. Naibasar daytoy iti land area ta isu ti kadakkelan iti probinsia – 82,893 nga ektaria. Addaan iti kadagupan a 6,000 a populasion a buklen ti sangapulo a barangay.

Maysa a gayyemko sadiay siudad ti Baguio ti nagdamag no kasano ti mapan iti ili a Tineg. Agtrabtrabaho daytoy iti maysa a mining company ket kasapulanna ti posting ti maysa a proyekto ti kompaniada.Ti Tineg ti puntiriada a papanan.

Imbagak nga awan ti pangpasahero a lugan a makadanon sadiay. Ta idi nagkasar ti maysa a gayyemko a taga-Bangued, kinunana a nangrugida a nagdaliasat kadagiti kakabagianna a taga-Tineg iti Nobiembre 29 ket nakadanonda iti kabesera iti rabii ti December 1. December 2 ti petsa ti kasar.

Saanko unay idi nga intaltalek dayta nga istoria, ti ammok, nalaokan laeng ta kasla saan a nakakappapati a kastoy ti kabayag ti panagdaliasatda idinto nga addatayon iti moderno a panawen nga adun dagiti klase ti transportasion.

Tapno makumpirmak, tinawagak ti kinaklaseak iti kolehio a taga-sadiay ngem agtrabtrabaho kas DJ iti Spirit FM iti Bangued.

Kinumpirma ti kinaklaseak nga awan ti passenger jeep a makadanon sadiay. Kinunana a tallo nga aldaw ti pagnaen sakbay a madanon daytoy nga ili. Agpaut met iti tallo nga aldawno sumalogka nga agawid. Kasapulan a kumpleto ti balonmo no mapanka sadiay, taraon, danum, pagpellesan ken tured ti pakinakem, kinuna pay ti gayyemko.

Naawatak insigida ti naudi a kinunana. Kabambantayan ti ili a Tineg ket maysa daytoy kadagiti identified area a pagdakdakiwasan dagiti “kadua iti ruar” a kunkunada. Dimo ammo no dagiti masabatmo ket miembro ti gerilia a rebelde ngem saan kano met a mangdangran dagitoy iti sibilian.

Segun iti gayyemko, nailet, bako-bako, nasang-at-nasalog, ken napitak ti dalan nangruna no agtudtudo. Makasugat kan iti saka dagiti dadduma a paset ti dalan a pagnaan no nagbalinen a bingkol ti dati a pitak.

No mapanka iti Tineg, agluganka nga agturong iti ili a San Juan, Abra. Nasurok maysa nga oras ti biahe sakbay a madanon ti barangay a maudi a madanon ti lugan.

Kalpasanna, irugimon ti tallo nga aldaw a “walk with faith” kas panangiladawan ti gayyemko. Nupay kasta, adda met dagiti kabalbalayan a malabsam iti panagdaliasatmo ket mabalinmo ti dumagas a makiinum wenno aginana.

Natural a managpadagus dagiti Tingguian (awag kadagiti tribu ti Itneg kadagiti upland towns ti Abra). No mapanka iti maysa a barangay, arig dika makatig-ab iti bussogmo ta tunggal balay a papanam, adda taraon nga idasarda kenka.

Kinuna ti gayyemko a sukatanda iti sangabukel a sibibiag a native a manok ti sangalata a sardinas. Ibilang kano dagiti agnaed nga espesial a sida ti sardinas.Ta iti kinaadayo ti kabisera, dandani awan makadanon a komersial a tagilako iti lugarda. No adda man dagiti sumagmamano a makadanon a lako, doble wenno triple ti agbalin a presioda.

(Adda tuloyna)