Ipon, maipariten a makalap iti Agosto ken Pebrero tunggal tawen

VIGAN CITY – Inaprobaran ti sangguniang panlalawigan bayat ti sessionna itay nabiit ti proposed ordinance ti total ban iti panagkalap iti ipon iti probinsia iti bulan ti Agosto ken Pebrero tunggal tawen.

Sagudayen ti nasao nga ordinansa ti pannakaideklara ti total a pannakaiparit iti panagkalap iti ipon iti las-ud ti territorial jurisdiction ti probinsia ti Ilocos Sur iti iruruar daytoy seasonal a lames iti bulan ti Agosto ken Pebrero tunggal tawen.

Naituding pay ti pannakaipakat ti multa iti asinoman nga aglabsing iti nasao nga ordinansa.

Pinutar da Vice Gov. Deogracias Victor Savellano ken Bokal Pablito Sanidad ti nasao nga ordinansa a panggepna ti pannakasalaknib ti ipon, maysa a klase ti seasonal a babassit a lames a rumrummuar laeng manipud iti bulan ti Septiembre agingga iti Marso.#