Irrigators iti rehion, nagtataripnong

CANDON CITY -Agdagup iti sangaribu nga irrigators manipud iti Ilocos Sur, Ilocos Norte, La Union ken Pangasinan ti nagtitipon iti Candon Civic Center ditoy siudad idi Mayo 22 kas pakpakauna ti selebrasion ti panagtawen ti National Irrigation Administration .

Segun ken ni Regional Irrigation Manager Engr. Manuel Collado, nakipartisipar ditoy dagiti presidente dagiti nadumaduma nga irrigators’ association kadagiti nadakamat nga uppat a probinsia.

Kinuna met ni Konsehal Jaime Gapatan, presidente ti irrigators iti Ilocos Sur, a tinawen a maisayangkat ti Irrigators’ Congress ket iti Candon City ti nakaiskediul ita a tawen a pakaisayangkatanna.

Nadumaduma nga aktibidad ti naisayangkat iti daytoy nga aldaw a pakairamanan ti VTR showing ti pakasaritaan ti NIA, on the spot painting contest, pannakapadayaw ken pannakabigbig dagiti best irrigation associations.

Maangay ti Maika-50 a panagtawen ti NIA iti mabiit, segun ken ni Collado.#