Footer

IS-PENRO: Saan laeng koma nga agpatingga iti photo ops dagiti tree planting programs

BANTAY, Ilocos Sur – Saan a panagpatingga laeng iti panagpaala iti ladawan dagiti makikaysa kadagiti tree planting programs ti gobierno ken pribado a sektor, ngem nasken a masibugan ken mataraken dagiti mula agingga a dumakkel ken mabalinda a pagsalinongan dagiti tattao.

Dayta ti apila ken kiddaw ni Ms. Rosemarie Jornacion, Provincial Environment and Natural Resources Officer ti Ilocos Sur kadagiti umili kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum iti opisina ti Department of Environment and Natural Resources iti daytoy nga ili.

Inlawlawag ni Ms. Jornacion dagiti tree planting programs para ti reforestation projects ti DENR para ti pannakapaberde dagiti kabakiran ken kabambantayan ti probinsia.

“Nagadu dagiti tree planting activities ti gobierno iti naglabas ken dagiti non-government organizations wenno pribado a sektor ngem saan met a nasibugan ken naaywanan dagiti naimula a seedlings,” kinuna ni Ms. Jornacion iti panangilawlawagna iti paliiwna a kaaduan kadagiti naisaysayangkat a tree planting projects ket nagpatingga laeng ti pannakaimula dagiti patubo ken panagpaala iti ladawan dagiti nagmula, ken saandan a nasibugan ken naaywanan aginga iti dimmakkelda.

Impakaammona nga iti agdama a programa ti DENR ket nainget ti pannakamonitor ti pannakaimula ken idadakkel dagiti patubo tapno sigurado ti panagbiagda.

Nagballaag pay kadagiti illegal nga agpukpukan iti kayo a madusada ken makompiskar dagiti kayo a pinukanda. Impakaammona pay nga uray dagiti mapukan a kayo kadagiti pribado a daga ket kasapulan a mangala ti akinkukua iti permiso iti PENRO tapno saanda a matiliw nangruna no dagiti mapukan ket centennial tree wenno maibiaheda iti sabali a lugar. Impakaammona nga adda memorandum of agreement ti DENR ken ti Philippine National Police ken Philippine Army a mangsitar ken mangtiliw kadagiti agpukan ken agibiahe ti kayo nga awan ti permit wenno dokumentoda.

Iti pakaseknan dagiti kayo a nakatakder kadagiti nasemento ken paset ti road widening projects ti Department of Public Works and Highways, inlawlawagna a kasapulan a dagiti kontratista ket agaplikar ti pannakapukan dagiti kayo iti PENRO tapno maamiris ti kasasaad dagitoy a kayo no nasken a mapukanda. Impasingkedna a saan a lapdan ti PENRO ti pannakapukan dagiti kayo iti igid dagiti kalsada no kasapulan a talaga ngem nasken ti permit nga aggapu iti opisinada.

Nagapila ni Ms. Jornacion kadagiti umili iti pannakikaysada iti pannakasaluad ti aglawlaw ken nakaparsuaan babaen ti panagmula iti kayo, saanda a panagpupuor kadagiti basurada ken pannakaibellengda kadagiti tumutop a lugar. Inaklonna a kaaduan a local government units ket awan pay laeng dagiti tumutop a sanitary land fill-da para ti Solid Waste Management kas mayataday iti national law a tunggal LGU ket nasken nga addaan iti natalged a pagibellengan iti basura, ngem mangnamnama nga agtungpaldo met laeng dagiti LGU tapno masaluadan ti nakaparsuaan. (Eden Alviar)

Photo: TREE PLANTING PROGRAM. These mahogany trees that now provide shade at the Easter Park of St. John Parish, San Juan, Ilocos Sur were planted in 1995. The PENRO Office of Ilocos Sur in a press forum recently criticized many tree planting activities that served only as photo ops because the organizers did not follow up with proper care for the seedlings which eventually died. (photo by Eden Alviar)

, , , ,