Footer

ISAH, mangangay medical mission, pasalip

Idauluan i Danny Villaruz (i-Santa, Ilocos Sur) ti nasurok 100 a kameng ti Ilocos Surian Association of Hawaii (ISAH) a mangisayangkat iti homecoming mission iti probinsia ti Ilocos Sur itoy umay a Disiembre 17-23.

Kinuna ni Villaruz nga esponsoran ti ISAH ti medical mission iti Gabriela Silang General Hospital ken ti ili ti Santa, Cabugao, Santiago, ken Banayoyo ken dagiti agduduma a pasalip kas iti scholarship tour para kadagiti estudiante iti elementaria ken highschool; Ilocos Sur's Got Talent para kadagiti banda, choral groups, dancers, acrobats ken dadduma pay a talento ken ti Ilocos Sur Idol a pagsasalipan dagiti kumakanta.

Maipalagip nga immuna nga inesponsoran ti ISAH ti Ilocos Sur Idol iti immuna a homecoming missionda idi Disiembre 2005.#