ISAH, mangipaay iti medical mission iti Vigan City

VIGAN CITY – Mangipaay ti Ilocos Surians of Hawaii iti medical mission ditoy siudad, daytoy ti impakaammo ni Bokal Jeremias Singson itay nabiit.

Kinuna ni Singson, chairman iti committee on health and appropriations iti Sangguniang Panlalawigan a karaman kadagiti serbisio ti salun-at nga ipaay ti ISAH ti libre a major ken minor operations para kadagiti marigrigat nga agindeg iti siudad.

Innayon ni Singson a karaman kadagiti mangkuyog iti ISAH da Danny Villaruz, presidente ti nasao a gunglo, dati a Congressman Jun Abinsay, taga-Vigan City, dati a Congressman Romy Cachola, ken Engr. Lito Alcantara, akinkukua iti The Builders, maysa kadagiti dakkel a construction firm iti Honolulu.

Kinuna ti bokal a mangidonar met ti Knight of Rizal, New Jersey, USA Chapter, iti pagbasa nga anteohos idinto a wheel chair ti ited ti gobierno probinsial para kadagiti lallakay ken babbaket.#